Mizoram kohhran hruaitute'n mipui hriat tur thuchah an tichhuak

Mizoram Kohhran Hruaitute Committee (MKHC) chuan August 3, 2021 khan mipui hnena thuchah an tichhuak. Tunlaia Mizoramin boruak a hmachhawn mekah thuchah siam ṭula an hriat thu tarlangin, ngai pawimawha zâwm ṭheuh turin mipui an ngen.

MKHC hian Covid-19 hripui léng laka mipui him theihna tura theihtawp chhuaha hma latu sorkar hotu te, tlawmngai pawl leh mawhphurtu hrang hrangte hnenah an lawm tih an tarlang a; July 18, 2021 zana hripui léng a reh theih nan leh ramri buai chinfel a nih theih nana rampum huap ṭawngṭai rual an huaihawt ṭha taka zawmtute chungah lawmthu an sawi bawk.

MKHC chuan, "Kan buaina zawng zawng min chinfelsak theitu chu Pathian a ni," an ti a; Covid-19 léng a reh a, ramri buaina zawng zawng ṭha taka chinfel a nih theih nan theihtawp chhuaha Pathian aua ṭawngṭai zel turin Mizoram mipui an ngen nghal a ni.

MKHC thu­chah dangte
1. July 26, 2021-a Mizoram chhunga Assam police leh Mizoram lamte inkara ralthuam leh tharum hmanga intihbuaina thleng leh nunna hlu tak chán leh hliam eng emaw zat an awm hi pawi kan ti. Lusûn chhungte kan tuarpui a, hliam zawng zawngte an ṭhat chhuah leh thuai kan duhsak a, an tan kan ṭawngṭai a ni.
2. Mizoram sorkarin ramri buai chingfel tura hma a la hi lawmawm kan ti a, huaisen takin hma la zel se ṭha kan ti a, sorkar hruaitute tan kan ṭawngṭai reng a ni.
3. Covid-19 vei kan pun zel avangin a invênna kawngah thâ thlah mai theih a la ni lo. Hemi lama mawhphurtute pawh tlawmngai taka ṭan la zel turin kan ngen a, mipui lam pawh kan himna tura sorkarin páwna chhuak loa mahni ina inkhàrkhip rih tura min ngenna hi zâwm hram hram turin kan inngen a ni.
4. Hripui leh ramria harsatna kan tawh lai hi Mizoram mipuite inlungrual leh thukhat vuana kan awm a ṭul hun a ni a; tu mahin politics leh sumdawnna kawngahte mimal leh pawl bik hamṭhatna atan emaw, inbeihna atan emaw hmang lo turin kan inngen. Boruak ṭha lo thlen thei chi leh thu belhchian dâwl lo social media lama vawrh darh lo tur leh kan zinga hnam dang awmte harsatna thlen thei tur laka inveng fimkhur hram hram turin mi tin kan ngen a ni.