High Court khak ngai sorkar neih a vanduaithlak - ZPM Ṭhalai

ZMP Ṭhalai chuan thuchhuah siamin, Gauhati High Court, Aizawl Bench-in a rang lama Lungleia RT-PCR khawl bun vat tura thuthlukna a siam leh Mizoram sorkar a hriattir chu lawmawm an tih thu an tarlang a; "High Court-in a khak ngai sorkar kan nei hi a vanduaithlak hle a ni," an ti.

ZPM ṭhalaite chuan, High Court-in Lunglei mipui tana RT-PCR khawl bun tura a ti leh YMA Sub-Headquarters President leh Lunglei Ṭhalai Pawl Chief Organiser-te telna tur committee siam thuai tura thuthlukna a siam chu lawmawm an tih thu an sawi a; RT-PCR khawl chu Mizoram chhim lam tana hri dona kawnga hmanraw ṭangkai tak a nih ngéi an beisei tih an tarlang.

Mizoram sorkarin chhim lam mipuiin RT-PCR lab. an mamawh lo tih an sawi chu vanduaithlak an tih thu sawiin ZPM Ṭhalai chuan, "MNF kaihhruai sorkarin Mizoram chhim lamin tun dinhmunah RT-PCR khawl an mamawh lo tia a sawi zet hnuah High Court-in Mizoram chhim lama RT-PCR khawl bun tura thuthlukna a siam hi Mizoram sorkarin Covid-19 dona kawngah theihtawp a chhuah lohzia a lang chiang hle ni," an ti.

Mizoram sorkar chu hripui donaah High Court khak ngai loa ṭan la tawh turin an phût tih ZPM ṭhalaite chuan an tarlang bawk.