Lungleiah RT-PCR dah a nih loh nan Sorkarin sum tam tak a séng - MPCC

Mizoram Pradesh Congress Committee (MPCC) chuan thuchhuah siamin, RT-PCR laboratory chungchangah Lunglei mipuite'n Mizoram sorkar an hneh ta tih an tarlang a; Lungleia RT-PCR lab. dah a nih loh nan sorkarin sum tam tak a séng niin an sawi bawk.

MPCC chuan, MNF kaih­hruai sorkarin Mizoram chhim lama RT-PCR lab. bun a nih loh nana theihtawp a chhuah hnuah Gauhati High Court-in sorkar duh dan a hnâwl tih an sawi a; Lungleia RT-PCR hman a nih theih nana hma la nghal tur leh a din dan ngaihtuahtu tur committee din nghal turin sorkar a hriattir tih sawiin, "Hei hi Lunglei mai ni lo, Mizoram chhim lam district palia mipui tan hnehna ropui tak a ni," an ti.

Congress party chuan, "MNF sorkar hian Lungleia RT-PCR lab. bun a nih loh nan theihtawp chhuahin, a ukil ṭha ber ber a ruai a, sum tam tak a sêng. Covid-19 in Lunglei mipui nasa taka a tihbuai avanga laboratory ṭha mamawh ngawih ngawiha an awm lai pawhin 'Lungleiah RT-PCR lab. an mamawh lo, dah ṭulna a awm lo' tiin Court-ah a ṭang reng a ni," an ti a; MNF sorkar chu chhuanlam siam loa High Court thu anga hma la nghal turin an chah.

Mizoram chhim lama chengte'n Covid-19 vei na zualte enkawlna tur Covid dedicated hospital an mamawh hle tih sawiin MPCC chuan, "Damdawi-in a awm loh avanga nunna chán hial an awm tawh a ni," an ti a; Mizoram sorkarin Lunglei mai ni lo, district tinah Covid dedicated hospital din thuai se an duh thu an sawi.

Mizoram Pradesh Congress Committee chuan, Mizoram sorkarin 'Emergency Covid Response Fund' hnuaiah hripui dona tur sum sorkar laipui aṭangin a dawn tam tâwk bakah dawn tur tam tak a la nei tih sawiin, "Laboratory siamna tur pawh a tam tâwk hle a ni. MNF sorkar hian hri darh chhanah mipui puh zel lo se, VTF/LTF leh kohhrante kuta innghat ringawt loin, hripui donaa sorkar tih tur chin hi hneh takin ti ve rawh se," an ti.