Vawk hri endikna hmanrua hlân

FOCUS Project hnuaia vawk hri léng endikna hmanrua (ASF/PRRS rapid test kit) leite chu nimin khan Agriculture secretary J Hmingthanmawia'n a pisaah Animal Husbandry & Veterinary (AH&Vety) department hotute hnenah a hlân.

J Hmingthanmawia chuan, tunlai vawk hri léng mek avangin vawk tam tak a thi tawh a, vawk vulhtute'n cheng tam tak an hloh mek tih sawiin, "Vawk hri a darh dan chhuina leh hriat chhuah thuai theihna turin Agriculture department hnuaia FOCUS Project chuan test kit leh hmanraw dang eng emaw zat a lei a, hengte hmang hian hri kai a hmuh chhuah zung zung theih dawn a, hri darh zel tur venna leh danna atan a ṭangkai hle dawn a ni," a ti.

FOCUS Project hnuaia hmanraw leite chu ASF test kit 2,000 leh PRRS test kit 400 a ni a; ELISA kit, Spectrophotometer, PPE leh laboratory hmanraw dangte pawh Agriculture department chuan AH&Vety hnenah la pek leh an tum a ni.