Twitter-a thil tarlan chungchangah MNF-in Robert Romawia an chhuang

MNF party chuan nimin khan thuchhuah siamin, minister of state Robert Romawia Royte chu Twitter-a Assam chief minister Himanta Biswa Sharma kaihhnawih a dah chungchangah chhuanawm an tih thu an tarlang.

MNF chuan, Robert Romawia'n tun hmaa Assam sorkar aṭanga Achiever Award a dawng lai leh Assam CM hlui leh Governor awm ve laia Aizawl FC Award, India Vice President aṭanga a dawng lai thlalak Twitter-a a dah chungchangah, hmarchhak state-te hmasawn vek a ṭul thu leh remna a pawimawh thute a tarlang tel tih an tarlang a; Assam CM Himanta pawhin lawmthu sawi chungin remna leh hmasawnna atana ṭanho vek a duh thuin a chháng tih an sawi.

Minister Robert Romawia'n Twitter-a a tarlan chu political party ṭhenkhatin mipui bum tum nan an hmang a, kim si loin an thehdarh nia sawiin MNF chuan, "Assam CM hlau leh tlawn hiala kan minister puhna press release an tichhuak hi an ti mak tak zet. Kan Minister-in Twitter hmanga a hmalakna hrang hrangte hian a huaisenzia leh Assam CM a ngamzia a tilang chiang hle zawk a, kan chhuang hle a ni," an ti.

MNF party chuan, chief minister Zoramthanga'n ramri buainaa hma a hruai dan te, minister-te leh MLA-te hmalak dante ropui an tih thu sawiin, "An lo tih fo tawh anga Pu Robert Romawia chungchanga thil hotê ni sia PR siam a ni leh hian a chakzia leh a hnathawh ṭhatzia a tilang a ni," an ti a; Robert Romawia'n Myanmar ráltlânte chhawmdawlna kawnga hma a lakna te, ramri buai harsatna sutkianna kawnga a hmalakna te, department pathumte a enkawl dan leh hmasawnna a thlen dante chu ropui an tih thu an sawi bawk.

Political party ṭhen­khatte chu thu belhchian dâwl lo leh thu dik zîktluak lo thu vawrhdarh chíng tawh lo turin MNF chuan an chah a ni.