KHAWTHLIR

Swab sample endik rûnpui
August 4, Nilaini khan Aizawla veng paliah swab sample endik runpui kalpui leh a ni a, mi 5,577 endik zingah hripui vei mi 120 (2.15%) hmuh chhuah a ni. Veng tina hripui vei hmuh dan chu - Armed Vengah sample 1,748 aṭangin mi 66 (3.77%), Ramhlun South-ah sample 2,576 aṭangin mi 38 (1.47%), Nursery Vengah sample 810 aṭangin mi 15 (1.85%) leh Laipuitlangah sample 443 aṭangin mi pakhat (0.22%) a ni.

Bill pekna hawng
Serchhipa online kaltlanga tui bill pek theihna tur buatsaih thar chu nimin khan PHE chief engineer HC Lalnunzira'n a hawng. HC Lalnunzira chuan, kum 2018-ah Mizoramah Smart Water kalpui ṭan a ni tih sawiin, "Aizawlah bul ṭan a ni a, nikum 2020 leh kumin tirah district dang pangaah online bill payment kalpui tawh a ni. Serchhip district hi a pasarihna a ni a, district thar pathumah pawh survey neih mek niin, online bill payment kalpui thuai theih beisei a ni," a ti.

Police tanpui
Mizoram Armed Police Association chuan Mizoram leh Assam ramri, Kolasib leh Mamit district-a police duty mekte chu ṭanpuina Rs. 1,90,000 nimin khan an pe. Ṭanpuina sum pe tur hian MAPA general secretary R Lalthianghlima leh finance secretary Lalhmunmawia-te an kal a, an kalna tur lirthei ngaihtuahsaktu minister Robert Romawia Royte chungah an lawm tak zet tih an tarlang.

Councillor-in tanpui
AMC Ward-XVI councillor R Lalawmpuii chuan Nilaini leh nimin khan a bial chhûnga veng pathumte a tlawh kual a, ṭanpuina chi hrang hrang a hlân. Bethlehem Vengthlang LTF hnenah Rs. 35,000, Bethlehem Veng leh College Veng hnenah Rs. 26,000 ve ve bakah, buhfai leh alu ṭhahnem tak a hlân a ni. Hripui vei mek Bethlehem Vengthlangah mi 316, Bethlehem Vengah mi 172 leh College Vengah mi 91 an awm mek.

Ambulance hlân
Thorang bialtu MLA Zodintluanga Ralte chuan Lunglei district tana ambulance hman tur a lei chu August 4, Nilaini khan Lunglei DC V Lalsangliana hnenah a hlan. Ambulance hi Maruti Eeco van a ni a, MLA fund aṭanga lei a ni. Zodintluanga hian Lunglei khawpuia veng pakua hnenah community quarantine centre-a duty-te hman tur hripui laka invenna hmanraw chi hrang hrang a hlân bawk.

Mini Marathonbuatsaih
Lungleia hmunpui nei Assam Rifles chuan nimin khan Lungpuk khuaah Mini Marathon an huaihawt a, khawtual mi 31 leh Assam Rifles mi leh sa 40 an tel. Mini Marathon hi khawtual mite leh AR sipaite inṭhian ṭhatna atana buatsaih a ni.