Mizorama luh tum lirthei tichhia : Assam aṭangin Mizoramah lirthei la lut lo
Nimin khan Cachar aṭanga Mizorama luh tum lirthei pahnih chu Assam state chhungah vuak chhiat a ni. July 26, 2021 tlaia Vairengte dáia Mizoram police leh Assam police inkah hnuah Mizoram luhka pui ber NH-306 kaltlangin Assam aṭanga Mizorama lirthei lut nimin thlengin a la awm lo.
Cachar SP Raman Dhillon sawi danin, nimin khan Mizorama lut tur lirthei pahnih chu Silchar leh Lailapur inkarah tihbuai niin, vuak chhiat a nih bakah, kawngpuiah nawr leh a ni.
He thil thleng hi an chhui zui tih sawiin Cachar SP chuan, "Sorkar chuan mipuite Mizoramah zin turin travel advisory withdraw a nih hma pawhin kan ti (encourage) reng a, mahse, an hlauh avangin an kal hreh deuh niin a lang," a ti.
Assam state chhunga nimina lirthei an tihchhiatte chu vai lirthei, kuhva rah phur a nia thu dawn a ni.
Vairengte aṭanga thu dawn danin, July 26-a inkah hnuah nimin tlai thleng khan Assam aṭanga Mizorama mipui mamawh bungraw phur lirthei lut, Vairengte police checkgate paltlang an la awm lo a; niminah Assam state chhungah Mizorama luh tum lirthei tihbuai a nih avangin, tun dinhmunah chuan bungraw phur lirthei Mizoramah a luh mai a beiseiawm rih lo a ni.
Hetih lai hian, NH-306 kawngpui dan chu tihtawp a nih a, Mizoramah bungruate phurh luh a nih theih nan Kolasib DC leh Cachar DC-te'n hma an la a, an indawr reng thung.
Vanglaini palai zawhna chhangin Kolasib DC Dr H Lalthlangliana chuan, Assam state chhunga Mizoram pawhtu kawngpui dan chungchang chu an bawhzui reng thu a sawi a, "Hma kan la a, Cachar DC nen kan inbe reng a ni," a ti.
Kolasib DC chuan, "Mizoram chhungah chuan lirthei khalhtute an buai lohna turin clearance kan pe a, Cachar DC hnenah pawh ka thawn a. Clearance lo pe ve ru, kan ti a, anni pawhin hma an la a ni," a ti a; lirthei khalhtute chuan Mizorama luh an hlauh vang ni loin, Assam state chhungah tihbuai an nih an hlau a, Mizorama luh an tum ngam rih lo zawk nia a lan thu a sawi bawk.