MZU-in UG exam result a tichhuak : MZU hnuaia UG result ṭhat ber ṭum a ni

Mizoram University chuan nimin zing dar 9 khan under graduate - BA, B.Sc., B.Com. leh B.Sc (Home Science) second, fourth semester leh sixth semester exam result a tichhuak. Final year/semester-ah zirlai 4,117 an pass a, MZU hnuaia result a ṭhat ber ṭum a ni.

MZU result chhuakah hian semester pathumah hian zirlai 17,585-in online exam an hmachhawn a, zirlai 17,019 an pass a, pass percentage chu 96.78% a tling.

Final year/semester bikah zirlai exam mi 4,462 awmin, chu'ng zinga 4,117 chu an pass a, pass percentage chu 92.27% a ni. Arts bikah Saitual College, Zawlnuam College, HATIM leh St. Xavier College aṭanga exam-te an pass vek.

Science-ah chuan Lunglei College ti ṭha berin, 98.25% an pass a; Commerce-ah HATIM leh Helen Lowry College aṭangin exam-te an pass vek a, Home Science-ah Zirtiri Residential Science College candidate-te an pass vek bawk.

Gold medalist (stream tina pakhatna)-te chu - B.A-ah Lalnunpuia Renthlei, Pachhunga University College (Political Science), B.Sc.-ah Malsawmkimi, Zoology, Zirtiri Residential Science College, B.Com-ah Lalṭhazuali, Hrangbana College leh, B.Sc. (Home Science)-ah K Malsawmsangi, Zirtiri RSC-te an ni.

MZU hian nimin vêk khan professional course 14 zinga course ṭhenkhat exam result an tichhuak a; Bachelor of Computer Application (BCA) final result tichhuahah zirlai 93 zinga 77 (83.69%) an pass. MCA, BBA leh Bachelor of Social work (BSW) result-te puan a ni tawh a, MCA-ah 93.75%, BBA-ah 90.91% leh BSW-ah 96.97% an pass a ni.

MZU controller of examinations Prof. Lalnuntluanga chuan, hripui lên laia exam hlawhtling taka neih theih a ni chu lawmawm a tih thu a sawi a; exam hmachhawntu zirlaite leh chhanna endiktu college zirtirtute chungah lawmthu a sawi bawk. Mizoram University hnuaiah hian under graduate zirna college 29 a awm a, chu'ng zinga college 22 chu sorkar enkawl an ni.