Tuialhthei khuahkhirhna thupek chhuah

Food, Civil Supplies & Consumer Affairs (FCSCA) Director chuan nimin khan tuialhthei - petrol leh diesel khuahkhirhna thupek a tichhuak.

Sorkar thuchhuah tarlan danin, tuialhthei khuahkhirhna hi sorkar leh mipuite'n harsatna lian an tawh lohna tur leh a mamawhtute'n rualkhai zawka an chan theihna tura The Mizoram Trade Articles (Licensing and Control) Order, 1987 para 24 & 25 tlawhchhana chhuah a ni a; hei hian July 26, 2021-a order chhuah tawh chu a luahlân a ni.

Thupekah hian, lirthei chi hrang hranga tuialhthei hralh theih zat bithliah a ni a, bithliah aia tam pek chhuah phal a nih loh bakah, bûr hmanga lak phal a ni lo.

Filling station-te chu tuialhthei an neih zat ni tin zing dar 9-ah Legal Metrology hnenah hriattir tura tih an ni a; petrol litre 5,000 leh diesel litre 7,000 aia tam lo a nih chinah FCSCA hriatpuina leh phalna loa pek chhuah loh tur a ni a, a ṭul angin FCSCA-in ruahmanna a siam ṭhin ang, tih a ni.