COVID-19: Mizoram dinhmun : Hripui vei 725 hmuh belh a ni

August 5, Ningani khan Mizoramah Covid-19 vei mi 725 hmuh chhuah a ni a, August thla ni nga chhungin mi 3,883 hmuh chhuah a ni tawh. Nimin khan hripui laka fihlim tawh mi 589 chhuahtir an ni a, Ningani zan leh nimin khan hripui vangin mi pathum an thi.

Covid-19 vei hmuh tharte chu mipa 332 leh hmeichhia 393 an ni a; ZMC laboratory-a hmuh chhuah 129, TrueNAT hmanga hmuh 13 leh Rapid Antigen Test hmanga hmuh 583 an ni. Nimin zinga result tihchhuah hnuah enkawl mek mi 13,101 an awm a, an tam lai ber a ni.

IDSP record angin, Mizoramah Covid-19 vei mi 42,808 hmuh chhuah a ni tawh a, mipa 22,391 leh hmeichhia 20,417 an ni. Nimin tlai dar 5 thleng khan mi 30,136 (70.40%) chhuahtir an ni tawh a, mi 161 (0.38%) thi tawhin, enkawl mek mi 12,511 (29.22%) an awm.

August 5, Ningania swab sample endik dan chu - ZMC laboratory-ah Aizawl leh Mamit district-a mi 1,647, TrueNAT hmangin district pakuaah 331 leh RAT hmangin district 11-ah 5,724 a ni a, a vaiin sample 7,702 niin, hripui vei hmuh chhuah 725 chu 9.41% a tling. Positive percentage hi ZMC-ah 7.83%, TrueNAT-ah 3.93% leh RAT-ah 10.18% a ni.

Covid-19 positive hmuh chhuah zat hi Aizawl district-ah mi 515, Mamit district-ah 62, Kolasib district-ah 57, Lawngtlai district-ah 51, Lunglei district-ah 18, Champhai district-ah 14, Siaha district-ah pasarih leh Saitual district-ah pakhat an ni a; Aizawla veng 61 leh khaw dang 34-a mite an ni. Hripui vei hmuh thar mi 725-te chu symptom nei 371 leh nei lo 354 an ni a; tualchhunga kái 722 leh tun hnaia state pawn aṭanga rawn lut pathum niin, tualchhunga kái zingah kàina chin hriat loh mi 336 an awm.

Hripui vei hmuh thar mi 725 zingah nausen kum khat tling lo paruk an tel a, a naupang ber chu thla 3 mi a ni. Kum 60 chung lam 50 chuang an awm a, a upa ber chu kum 89 mi a ni. August thlaah ni nga chhungin Mizoramah Covid-19 vei mi 3,883 hmuh chhuah a ni tawh a, chawhrualin ni tin mi 776.6 hmuh chhuah an awm ang a ni. Mizorama Covid-19 vei hmuh tawh zat 42,808 chu kum 2011 chhiarpui angin, Mizorama mi 1,000 zelah hripui vei mi 39 an awm ang a ni.

Nimin khan tlai dar 5 thlengin hripui laka fihlim tawh mi 589 chhuahtir an ni a; Aizawl district-ah mi 308, Lawngtlai district-ah 80, Siaha district-ah 38, Kolasib district-ah 27, Mamit district-ah 20, Champhai district-ah pali leh, Lunglei leh Serchhip district-ah pahnih ve ve an chhuak. Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 11,635 hmuh chhuah a ni tawh a, TrueNAT-PCR hmangin 2,512, RAT hmangin 28,660 leh Guwahati-ah pakhat hmuh chhuah a ni tawh.

IDSP tarlan danin, August 5, 2021 thlengin Mizoramah swab sample 6,69,980 endik a ni tawh a, chu'ng aṭanga Covid-19 vei hmuh tawh zat 42,083 chu 6.28% a ni. Hripui vei hmuh tawh zinga mi 38,564 chu Mizoram chhunga kái chhâwng an ni a, mi 4,244 chu Mizoram páwn aṭanga an rawn luh hnua hmuh chhuah an ni.