Covid hluar chhan RAT hman luih vang: Cong

Congress party chuan, Covid-19 donaah mipuiin sorkar an thláwp ṭha tih sawiin, hripui darh chhan chu mipui thiam loh ni loin, sorkarin a tih tur a hun taka a tih loh vang leh Rapid Antigen Test a hman tlat vang nia an ngaih thu an sawi a; sorkar chu Covid dedicated hospital (DCH) leh laboratory din belh turin an phût.

Nimina MPCC thuchhuah chuan, "Covid-19 donaah Mizoram mipuiin sorkar kan thláwp ṭha tâwk tih hi kan ngaihdan a ni. Hripui darh chhan hi mipui thiam loh ni loin, a hun taka sorkarin mass test a kalpui duh loh vang te, mithiamte'n a rintlak tâwk lo tih vawi tam tak an sawi RAT kan rin luih tlat vang te, ram dang aṭanga lo lutte kan vil ṭhat tâwk loh vangahte kan ngai," a ti.

Hripui donaah sorkarin a tih tur dik tak ti se an duh thu sawiin MPCC chuan, task force leh NGO-te kuta innghat ringawt lo a, Covid third wave thlen hmaa DCH leh laboratory-te din belh zung zung turin an chah a ni.

Congress party chuan, April 20, 2021 aṭangin lockdown kalpui a ni tih sawiin, "Mi tam zawk chu ni 100 chuang hna thawk mumal thei loin kan awm tawh. Covid-19 léng karah hian khawvelah Mizoram ang em ema inkhàrkhip rei an awm lo a, inkhàrkhip rei ber world record thar kan siam ta niin a lang," an ti a; thla thum chuang hna thawk mumal thei loa inkhàrkhip a nih avangin Mizoram economy-in a chhiat phah nasat thu an sawi.

Dâwmkân leh harsa khawpa dinhmun chhiaah chhungkaw tam tak an awm tawh thu te, khawpuia mi retheite'n inkhàrkhip an tawrh zual thu te, LTF/VTF-te chhawmdawlna peka innghat ringawt chhungkaw sang tam tak an awm thu te, in luah man leh dawr luah man pe thei lo, bill pe thei lo leh loan rûl thei lo tam tak an awm tawh thute an sawi bawk.

Mipui náwlpui ei leh bar dinhmun a chhe em em chungin mipuiin thuawih takin sorkar thu kan zawm zel thei a. Zing dar 6 atanga zawm tur order, a hma zan zanlaia chawpchilh taka sorkarin a puan pawhin mipuiin thu kan awih zel thei a, sum leh paia kan harsa em em chung pawhin sorkar thupek hi mipui nawlpui chuan kan zawm tha hle zel a ni. Hetiang taka Mizoram mipuite thuawihna hi a ropuiin, ram dangte tan pawha entawn tlak tak niin a lang.

Mipuiin lockdown an zawh tawh loh vanga lockdown hlîp tura sorkar nawrna a na ta hle tih sawiin MPCC chuan, "Total lockdown duh loh vang leh sorkar thu awih loh hrim hrim vang ni loin, dinhmun chhiat lutuk tawh vang zawk a ni tih sorkarin a pawm a ngai,," an ti bawk.