MNYF-in Lalremsiami an chhuang

Mizo National Youth Front (MNYF) chuan thuchhuah siamin, Tokyo Olympics 2020-a India hmeichhe hockey team-a tel Lalremsiami, Kolasib an chhuan thu an tarlang a, hma lam pan zel turin duhsakna an hlân.

MNF ṭhalaite chuan, Lalremsiami hlawhtlinna chu theihnghilh rual loh a nih thu sawiin, "Mizo history-a chuang reng tawh tur a ni," an ti a; Mizoram sorkarin theihtawpa a ngaihsakin a chawimawi tih an sawi.

MNYF chuan, Lalremsiami chu sorkarin Kolasib-a in hmun a pek dawn thu leh tihfel ṭêp a ni tawha an hriat thu an sawi a, "Youth Olympics leh Asian Games-a silver medal a lâk avangin sorkar chuan cheng nuai 20 a pe tawh a, Olympic hmeichhe hockey team-a a tel avangin cheng nuai 25 a pe leh dawn a, nuai 10 pek ni tawhin, Olympic zawh veleh a bâk hi pek leh tur a ni," an ti.

Mizoram sorkar chu ṭhalaite leh infiamna lam ngaihtuah em emtu a nih thu sawiin MNYF chuan, "Chief minister Pu Zoramthanga leh Sports minister Pu Robert Romawia Royte ten ṭhalai leh infiam mite hmakhua an ngaihna avangin Sports Policy siam a ni a, infiamna lama ti thei bik tan government hna 5% hauh a ni. Scholarship leh hamṭhatna dang dang siam a ni bawk," an ti. ṭhalaite leh infiamna atana sorkar hmalak dan chu lungawithlak an tih thu an sawi bawk.