Lockdown hlîp vek loa fimkhur taka Hna thawh theih dan tur siam an rél : Kan inpuahchah lâwkna pawhin a dâwl zo ngang tawh lo: Health Minister

Deputy chief minister Tawnluia hoin nimin khan sorkar hotute leh political party hruaitute'n Covid-19 donaa Mizoram kal zel dan tur an rêl a; lockdown hlîp vek si loa fimkhurna uar zawka kalpui chunga hna thawh theih dan tur inkaihhruaina khauh tak siam an rél.

He hunah hian Health minister Dr R Lalthangliana chuan sorkar inbuatsaih lawknain a tlin tawh loh hripui vei an awm mek thu a sawi chhuak.

Inrawnkhawmnaah hian, Mizoram dinhmun enin, total lockdown chu kalpui zel ṭul mah se, eizawnnain nasa taka a tawrh avangin pawhsei chhunzawm chu thil harsaah an ngai a; total lockdown hlih nghal erawh chu tih chi-ah an ngaih loh avangin fimkhur tak chunga sumdawnnate kalpui a, hna thawk theia inkaihhruaina khauh tak siam an rawt a ni.

Health minister chuan, Covid-19 thawh hnihna léng mek chu inkai a awlsam hle tih sawiin, "Kan inpuahchah lâwkna zawng zawng pawhin a dâwl zo ngang tawh lo a, hripui vei mek 13,000 chuang enkawl mek an ni," a ti a; Covid vaccine chu chak taka kalpui zel a ni dawn tih a sawi.

Report-a tarlan danin, August 5, Ningani thlengin Covid-19 vaccine mi 8,35,267 pek a ni tawh a, chu'ng zinga mi 2,01,739 chuan an la kim tawh.

Inràwnkhawmnaah hian Home minister Lalchamliana, School Education minister Lalchhandama Ralte leh IPR minister Lalruatkima bakah sorkar official dangte leh political party - BJP, INC, MNF, ZNP, PC leh ZPM aiawhte an tel a ni.