Covid-19 vei thi mi 3 an awm belh

Covid-19 vei enkawl mek zingah August 5, Ningani zan khan mi pahnih an thi a, nimin (Ningani zan zanlai pelh hnu) khan mi pakhat a thi bawk. Sorkar chhinchhiah angin, Mizoramah Covid-19 vei mi 161 an thi tawh.

Richard Lalthanzuala (36) s/o Lungmuana, Lunglawn, Lunglei chu August 5 zan dar 7:45 khan Covid-19 vangin Lawngtlai District Hospital (dedicated covid hospital)-ah a thi a, nimin chhun khan vui a ni. Covid-19 positive a ni tih August 3, 2021 khan hmuh chhuah a ni a, a tuk August 4-ah Lawngtlai District Hospital-ah dah luh a ni. Natna dang a neih sawi a awm lo tih Lunglei aṭanga thu dawnna chuan a sawi.

Ningani zan vek dar 8:40 khan hripui vei enkawl lai Lalhmingthangi (87) w/o Chawngzika, Baktawng Venglai chu State Referral Hospital-ah a thi a, nimin chawhma khan vui a ni. Covid-19 positive a ni tih July 31, 2021 khan Aizawlah hmuh chhuah a ni a, SRH-ah admit nghal a ni tih sorkar thuchhuakin a tarlang.

Baktawng Venglai YMA hruaitute chuan, Lalhmingthangi hi SRH-ZMC-a enkawl a nih laiin khum aṭangin a tla, a lu a sawh avangin a thluakah thi a tling tih an sawi a; tar chak lo lam tawh a ni tih loh chu bawrhsàwmna a neih an hre lo tih an sawi bawk.

Ningani zan zanlai pelh hnu dar 12:20 (August 6) khan Lalthlankaia (62) h/o Zosiamliani, Dinthar, Aizawl pawh Covid-19 vangin SRH-ah a thi a, hripui vanga thi 161-na niin, nimin chhun dar 12 khan Dinthar thlanmual inah vui a ni.

Sorkar thuchhuaka a lan danin, Lalthlankaia hi Covid-19 vei a ni tih July 21, 2021-ah hmuh chhuah a ni a, a tuk July 22-ah SRH-ah enkawl ṭan a ni. Amah hi zunthlum nei sa a nih thu leh Covid-19 vaccine la kim tawh a nih thu Dinthar venga thu dawnna chuan a sawi.