Network ṭha zawk neih dan tur sawiho

Nimin khan Champhai DC pisa conference hall-ah Champhai district-a mobile network changtlung leh ṭha zawk a awm theih dan tur sawiho a ni a, additional DC Henry C Lalrawnkima'n a kaihhruai.

Henry C Lalrawnkima chuan, ni tin khawsaknaah mobile services network-in hmun pawimawh tak a chan thûk tawh thu sawiin, "Rîkrum leh chhiat tawh thilte bakah dan leh thupek kenkawh kawnga inbiakpawh zung zung a ṭul chángin a pawimawh zual a, mobile service network ṭha leh changtlung zawk neih a tul hle a ni," a ti a; service provider-te chu theihtawp chhuah zel turin a chah.

Ṭhutkhawmah hian, services provider-te'n anmahni dawrtute harsatna sutkiang kawnga chak zawka hma an lâk theih nan customer service ṭha taka an kalpui theihna turin ruahmnna siam ni se, mipuiin an biakpawh zung zung theihna tur phone number mipuiah zau zawka hrilhhriat ni se, an ti.

Mobile network chian loh leh harsatna tawh chánga inhrilh zung zungna tur leh mipuite hrilhfiah theihna tur Situation Report Centre din ṭha an ti a, service provider-te chu harsatna an neih leh bawhzui ngaite DC pisaah August 13, 2021 hmaa thehlut vek tura tih a ni.