Lailapur-a buaina chhuak karah Assam aṭangin lirthei lo lut ṭan

July 26, 2021-a Vairengte dáia inkahna a thlen hnuah August 7, Inrinni zan khan Assam aṭangin Mizoramah lirthei a lo lut leh ṭan ta. Lirthei lo luh hma hian Lailapur-ah buaina chhuakin, Mizoram pantu lirtheite leh lirtheia chuangte'n kut an tuar. Buaina thlen dan leh a kalhmang chu duan lâwk a nih ringtu an tam hle.

Inrinni zan dar 9:30 vel khan lirthei ṭhenkhatin Vairengtea police checkgate an lut ṭan a; chutih laiin, Lailapur lama buaina chhuak avangin Mizoram lirthei eng emaw zat chu sahimna zawngin Silchar Mizoram House lamah an tlân kîr a ni.

July 26-a buaina chhuah hnuah August 5 khan Assam cabinet minister pahnih chu Aizawlah an rawn zin a, Mizoram minister pahnihte nen ramria buaina tihtawp dan tur sawihoin, ṭha takin an inrem thei a; Assam-in kawngpui an dan chungchang erawh joint statement an siamah ziah lan a ni lo. August 5 zanah Assam sorkar chuan an mi leh sate Mizorama zin lo tura thurawn a chhuah chu a sût nghal.

August 7-a thil thlen dan
Assam chief minister Himanta Biswa Sarma chuan August 7, Inrinni khan Mizoram panna kawng dan titawp turin minister pahnih Ashok Singhal leh Parimal Suklabaidy te chu Cachar-ah a tír a, Inrinni chawhnu lamah kawngpui dan chu hawntir a nih tur thu Assam sorkarin a chhuah.

Thu dawn danin, Silchar Mizoram House-a deputy resident commissioner (DRC) Kaptluanga hnenah Assam sorkarin police tírin, lirthei tangkhangte chu Mizoram ramri thlenga véng tura thupek an nih thu an hrilh a; DRC chuan fimkhur thilah Cachar SP a bia a, SP chuan an him ngei tur thu a tiam a ni. Chumi hnuah Mizoram Home Secretary a ràwn hnuah tlai dar 3:40-ah Assam police lirthei pahnihin an vênna hnuaiah Mizoram lirthei pakuate (HMV panga) chu an chhuak a, Silchar-a tangkhang lirthei dangin an zui bawk.

Lirtheite chu a chhan hriat lohin Sona­barighat-ah rei tak dintir an ni a, chutih lai chuan Silchar DRC chuan lirtheite chu kalkawngah vawm tum an awm tih report a dawn avangin Cachar SP leh DC a hriattir nghal a; anni erawh chuan anmahni Lailapur-a an awm thu leh buaina a awm loh tur thu an hrilh thung.

Mizoram lirtheite chu tlai dar 6 velah Lailapur thlengin, mipui pungkhawmin an lo bei a, lirthei ṭhenkhat an tichhia a, mi paliin hliam tênau an nei. Buaina a chhuah hnuah lirthei khalhtu pakhat chu Lailapur-a an hmelhriatte dawrah a biru a, lirthei dang zawng chu Silchar panin an kîr leh a ni.

Lirthei chhuah a nih dan
Lailapur-a buaina a chhuah vel lai hian Assam minister pahnih bakah, Cachar DC leh SP-te chu chu Lailapur-ah an awm a; an insawi dan chuan, Lailapur mipuite nen kawngpui hawng turin an indawr a ni.

Hetih lai hian, Inrinni chhuna Cachar tlawhtu MJA member-te sawi danin, kawngpui chu a hranpain tu mahin an dang lo a, lirtheite chu police lamin kal rih lo tura an tih angin an la ding vek thung.

Assam minister leh official-te leh Lailapur mite an indawr hnuah zan dar 9 pelh hretah Mizoram pan tur lirtheite chu chhuahtir ṭan a ni a, dar 9:30 velah a hmasa berte'n Vairengte an lut ṭan. Nimin tlai dar 5 thleng khan lirthei 204-in Vairengte an lut tawh a ni.

Assam police-te venna hnuaia chhuak Mizoram lirtheite Lailapur-a khawih a nih dan leh buaina chhuah dan avangin Mizoram sorkar hotu ṭhenkhat chuan Assam sorkar laka an lungawi loh thu social media-ah an tarlang a; minister Robert Romawia Royte chuan Twitter-ah, "Heng thil hi in ruahman lâwk em ni?" tiin Assam sorkar hruaitute chu a zawt a ni.