ZMC RTPCR Lab.-ah Swab sample endikna hmanrua an tlachham

ZMC-a RT-PCR laboratory chu swab sample endikna hmanrua (test kit) an tlâkchham avangin swab sample an endik tam thei rih lo a, mipui hriatthiamna an ngen. Test kit hi Assam-a kawngpui dan avanga tangkhang zingah a tel a, tun kar tìr lamah endik chhunzawm theih an beisei.

August 7, Inrinnia ZMC thuchhuak chuan, "Sample test-na hmanrua ICMR aṭanga kan dawn hi kan khawl hman lai nen a inmil lo a, a inmil zawk hi kawng lakah a tangkhan avangin vawiinah duh anga tam test theih a ni lo a, mipui hriatthiamna kan ngen e," a ti.

ZMC director Dr John Zohmingthanga tarlan danin, Indian Council of Medical Research (ICMR)-in RT-PCR test kit 20,000 a rawn pe a, RNA extraction kit pawh an dawng tel a; mahse, RNA extractor an dawn chu company dang siam a nih avangin an kháwl neih nen a inmil lo a ni.

RNA extractor chu Guwahati aṭangin Mizoram pana phurh ni mah se, Assam-ah kawngpui dan a nih avangin a rawn thleng mai thei lo a; a thlen hma chuan endik hmanhmawh ngai zualte chauh an endik dawn a ni.

Vanglaini palai zawhna chhángin ZMC Director chuan, an bungrua táng mekte chu an buaipui mek a, a rawn thlen hun tur leh dan pangngaia sample an endik ṭan theih hun tur an la sawi chian theih loh thu a sawi.

Hetih lai hian, tun hnaiah damlote mamawh damdawi pawimawh pahnih - Tocilizumab leh Monoclonal antibody-te chu phai lamah chah mah se, a rawn thlen mai theih loh avangin an tlachham tih ZMC Director chuan a tarlang bawk.