Sorkarin inkhàrkhip a thlahdul Partial lockdown kalpui ṭan a ni

Mizoram sorkar chuan nimin aṭang khan total lockdown a thlahdul a, partial lockdown kalpui ṭan niin, August 14, 2021 zanlai dar 12 thleng kalpui a ni dawn. Kaihhruaina thar ang chuan, phal chin neiin eizawnna hna thawh phal a ni a, Covid-19 vei awm lohna khuaah sikul kai theih a ni dawn.

Partial Lockdown inkaihhruaina thar angin, ṭul bikah zin veivah phal a ni a, mimal lirthei leh passenger phur lirthei hman phal a ni ang. Zan lamah zan curfew (zan dar 7 - zing 4) puan a ni a; Covid-19 vei lohna khuaah DC leh task force ruahmannain sikul kai theih a ni.

Aizawl khawpui huam chhung bikah chuan zirna-inte la hawn loh tur a ni a; biak-ina inkhawm pangngai phal a ni lo a, zing/tlai ṭawngṭai inkhawm erawh phal a ni. Hna thawh phal a ni a, dawrte pawh hawn hun bik siamin hawn theih a ni dawn a; zing dar 4-7 leh tlai dar 5-6:30 chhûngin taksa sawizawi leh thirsakawr khalh phal a ni. Sorkar pisaah thawktu 50% aia tam lo kal theih a nih bakah, pisa dangte pawh Covid-19 inkaihhruaina zâwm chungin a kal theih a; lirtheite an intlàn chhâwk bawk dawn a ni.

State Disaster Management Authority (SDMA) hnuaia State Executive Committee (SEC)-in total lockdown order a tihchhuah hnuhnung ber, July 31, 2021-a a tihchhuah chu August 7, Inrinni zan dar 12 khan a tawp a; hei vang hian SEC chuan August 7 tlai khan August 8-14 chhunga hman tur partial lockdown order thar a tichhuak a ni.

SDMA SEC order-ah chuan, "AMC area bikah ni tin hri kai thar tam tak an la awm zel a. Hetiang a nih avang hian Covid-19 darh zel tur vèn nan leh sorkar hmalaknate khaihlak loa tluang taka a kal zel theih nan inkhuahkhirhna eng emaw chen la kalpui chhunzawm ṭula hriat a ni. Chuvangin, SDMA chuan AMC huam chhungah partial lockdown puan ṭulin a hria a ni," tih a ni.