Hripui vei nau pai nau hrin hun tawh leh natna lang nasate chiah admit thei rih

Zoram Medical College / State Referral Hospital hotute chuan, nau pai, Covid-19 postitive-te chu nau hrin hun tawhte leh natna lang chhuak nasate chauh SRH-ah an admit theih rih thu an tarlang a, symptom nei nasa lote chu uluk taka lo inenkawl turin an chah.

Mizorama Covid-19 vei damlote enkawlna damdawi-in (dedicated covid hospital) awmchhun ZMC director Dr John Zohmingthanga chuan, Covid-19 leng thawh hnihnaa damlo an enkawlte leh thite an zir chiannaah, natna benvawn nei, a bikin lung ṭha lo, thisen sáng, zunthlum, tar chak lote leh nau paite an ngaihtuahawm bika a lan thu a sawi a, "Hetiang mi chênpui kan nei a nih chuan fimkhurpui a ṭul a, Covid-19 an kai palh a nih a, in lama an inenkawl a nih chuan uluk taka vil an ngai," a ti.

Dr John Zohmingthanga chuan, "Damlo ZMC-a admit te, a bikin home isolation aṭanga ZMC-a phurhte chu an thlen phei meuh chuan an chau hle tawh tlangpui a, hei vang hian in lama enkawltute'n uluk taka kan vil an mamawh a ni," a ti. Nau paite chu nau hrin hun tawhte leh natna lang nasate chauh an admit thei tawh tih sawiin, natna lang chhuak lo, CCC, CCCC leh home isolation-a awmte chu uluk takin inenkawl se a duh thu a sawi a ni.

ZMC Covid-19 Task Force nodal officer Dr PC Lalramenga chuan, Covid-19 laka himna turin vaccine lâk leh sample endik ran a pawimawh thu leh sorkarin sample endik rûnpui a buatsaih bakah, inrinhlelhna neite chu sample endik zung zung a pawimawh thu a sawi a, "Positive kan inhmuh chhuah rana kan inlak hran zung zung hi kan himna tur pawimawh ber pakhat a ni," a ti a; endik a tam a, positive hmuh a tam chuan hmunin a daih loh avangin in lama inenkawl tam a ngaih dawn thu a sawi.

Dr Lalramenga chuan, hripui léng chu inkai chhàwn a awlsam avangin mi tin an fimkhur lehzual a ngaih thu a sawi a, "Lockdown a ni emaw, ni lo emaw, kan fimkhur reng a ngai," a ti.

ZMC hotute chuan, hripui chu dan sèn a ni tawh lo tih sawiin, "Nikum lamah chuan positive zawng zawng deuhthaw kan admit a tih theih a, kumin kum tìr lam khan natna lang chhuak nasa lo kan admit tel ṭhin. Tunah erawh chuan natna lang chhuak nasa leh damlo na zualte chauh kan la tawh a ni," an ti a; chuti chung chuan khum a indaih loh thu an sawi.

SRH-ZMC hotute sawi danin, an khawlte chu chhum lo chat loa an hman avangin a rim hle. Thawktute chhun zan zawmin an thawk a; sorkarin volunteer mi 150 vel a laksak a, staff quarters-te tiruakin frontline worker-te'n an luah rih a ni.