Covid-19 vanga thi 167 tling tawh

August 7, Inrinni leh nimin khan Covid-19 vei mi paruk an thi a, sorkar chhinchhiah angin, Mizorama hripui vanga thi chu mi 167 an ni tawh.

Inrinni zing dar 7:15 khan Covid-19 vei enkawl lai Lalthlamuana (71), Saikhamakawn chu State Referral Hospital-ah a thi a, Inrinni vek khan vui a ni. Covid-19 vei a ni tih July 21, 2021-ah hmuh chhuah a ni a, July 23 khan SRH-ah dah luh a nih thu sorkar thuchhuakin a tarlang.

August 7 vek zan dar 9:25 khan J Malsawma (65), Sakawrdai chu hripui vangin SRH-ah a thi a, nimin khan vui a ni. Covid-19 positive a ni tih July 25-ah hmuh chhuah a ni a, SRH-ah dah luh nghal a ni.

Nimin zing dar 2 khan R Daniela (56), Vairengte chu Covid-19 vangin SRH-ah a thi a, nimin khan vui a ni. Covid-19 vei a ni tih July 7, 2021-ah hmuh chhuah a ni a, a tuk July 8-ah SRH-ah enkawl ṭan a nih thu sorkar thuchhuakin a tarlang.

Nimin zing vek dar 4:20-ah Lalthansiama (61), Chawnpui, Aizawl chu Adventist Hospital, Aizawlah a thi. Amah hi tun thla August 7 khan Adventist Hospital-ah natna dang vangin admit a ni a, chumi hnuah hripui vei a ni tih hmuh chhuah a ni.

Covid-19 vangin KV Lalhlimpuia (81), Tuikual North chu nimin chawhma dar 10 khan an inah a thi a, tlai dar 3 khan Tuikual North Presbyterian Kohhran biak-inah vui a ni.

Tuikual North LTF secretary T Lalrinpuia hnen aṭanga thu dawn danin, KV Lalhlimpuia hi natna dang vanga hun eng emaw chen bawksawp tawh a ni a, hripui vei a ni tih July 29-ah hmuh chhuah niin, a chhungte dang pawh hripui vei an nih avangin inah an inenkawl a ni. A chhungte chu an negative tawh hlawm laiin, amah hi Inrinni zana swab test-ah a positive thung.

Nimin vêk khan chawhma dar 11:15-ah Lalbiaksiami (48), Upper Republic chu Covid-19 vangin SRH-ZMC-ah a thi a, hripui vanga thi 167-na niin, nimin khan vui a ni. Covid-19 positive a ni tih August 3, 2021 khan hmuh chhuah a ni a, August 6 aṭangin SRH-ah enkawl ṭan a ni.