Vairengte an lungawi lo

August 7, Inrinnia Assam police venna hnuaia Silchar aṭanga chhuak Mizo lirtheite Lailapur-a beih a nih chungchangah Vairengte leh páwl hrang hrangin thuchhuah an siam.

Vairengte Joint VC chuan Inrinni zan khan an khuaa pawl dang hruaitute nen an ṭhukhawm a, resolution an siam. Mizoram lirtheite lambunnaah Lailapur mipuite a mawhphurtuah an ngaih avangin Lailapur mistiri leh helper, Vairengtea hna thawk ṭhinte chu kumin December 31 thleng Vairengtea hna thawk lo turin an hriattir a, Vairengtea awm mekte pawh nimin ral hmaa haw vek turin an hriattir a ni.

Mizoram leh Assam buainaah venhimna thawk tura dah CRPF-te chu Mizoram tan an him tâwk loa an ngaih avangin BSF dah zawk turin sorkarin an ngen a, Silchar aṭanga Mizoram lirthei vengtu escort party-te chu hrem ngei turin Assam sorkar an phût.

Assam sorkar ding lai chu sorkarna chelh zui tlakah ngai loin, Assam chu President's Rule-a dah turin sorkar laipui an phût a; Lailapur-a bungrua tihchhiarsakte chu zangnadawmna pe tura Assam sorkar an phût bakah, Lailapur-ah lirthei dan a awm leh chuan Lailapur khawtlang hruaitute leh mipui mawhphurhnaa an ngaih tur thu an tarlang bawk.

Vairengte khawtlang chuan, Assam-in NH-306 chu eng chen pawh dang se, Vairengte mipui leh khawtlang chuan harsatna an tawh theih zawng zawng chhel taka tawrh an inhuam thu an sawi a; Mizoram sorkar chu NH-306 kaltlanga bungrua la lut rih lo turin an ngen nghal a ni.