Minister-in hna thawh mek a enfiah

Tourism leh Sports changtu minister Robert Romawia Royte chuan August 7, Inrinni khan Hnahthiala football khelmuala phùl lem phah mek leh Thenzawl Golf Course-a Wellness Spa & Cafeteria sak mek a tlawh.

Robert Romawia Royte chuan, Hnahthial Field-a phûl lem phah leh chei ṭhat hna thawhna atan cheng nuai 682.90 ruahman a nih thu sawiin, "Sum hi sorkar laipuiin a tum vek a nih avangin project hi Mizoram sorkarin chhiah leh labour cess sum tam tak hmuh nan a hmang a, Mizo tam takin hna thawh tur an neih phah a, field ṭha kan nei dawn bawk a, hlép hlang a ni," a ti.

Sports Minister chuan, district thar pathum - Saitual, Khawzawl leh Hnahthialahte football field ṭha kuminah hawn hman beisei a nih thu sawiin, "Hmun dang 20-ah Mizoram sorkarin phùl lem ṭha a siam dawn bawk," a ti a; sports infrastructure hmangin Mizoram budget páwn lamah sum tam tak hûi luh a nih thu a sawi.

Tourism minister Robert Romawia hian Hmuifang Tourist Resorts-a Forest Pathway siam mek leh in thawm ṭhat hna thawh mekte a enfiah bawk.