KHAWTHLIR

Thisen pe
KṬP, Ramhlun Branch chuan an branch diamond jubilee pualin August 7, Inrinni khan Synod Hospital tan thisen unit 51 an pe a, a petute mipa 44 leh hmeichhia pasarih an ni. Lawngtlai College Veng unit ṬKP pawhin Inrinni vek khan Lawngtlai District Hospital tan thisen unit 13 an pe a, petute mipa pakua leh hmeichhia pali an ni.

Chhawmdawlna pe
SEL Foundation, Chanmari, Aizawl chuan chhawmdawlna atan Chanmari Local Task Force-ah Rs. 4,00,000 an thawh a, August 7, Inrinni khan chungkaw 142 hnenah an sem. Chhawmdawlna hi Chanmari taxi stand-a ding LMV taxi leh two wheeler taxi khalhtu mi 34 hnenah Rs. 5,000 ṭheuh leh Chanmari veng chhunga khawsak harsa zual chhungkaw 108 hnenah Rs. 2,000 leh 2,500 an hlan a ni.

CYMA-in dem
Central YMA chuan, Silchar-a Mizo lirtheite Assam sorkar ruahman anga Mizoram pana hruai chhuahte Lailapur-a mipuiin an tibuai leh tharum an thawh chu an dem tak zet thu an tarlang. Thil awm dan an thlithlai reng dawn tih sawiin, YMA sub-headquarters, group leh branch-te chu CYMA thu ngaichâng turin an ngen a ni.

Congress-in Police-te ṭanpui
Congress party chuan an mi leh sate sum thawh­khawm aṭanga an lei buhfai, chawhmeh leh damdawi ṭhahnem tak chu August 7, Inrinni khan ramria Mizoram police duty-te tan Vairengte Police Station-ah an hlân. Ramria duty-te ṭanpui nan hian Rs. 1,63,675 an thawh khawm a, buhfai ip 30, dailuah ip 10, alu ip 10, purun sen ip hnih, tél báwmpui paruk bakah, damdawi an lei a ni.