Aitlanga huan neitute'n an huan an neih lêt theih nan CM an pun

Vairengte Aitlang rama ram leh huan neitute chuan nimin khan chief minister Zoramthanga hnenah memorandum an thehlut a; Aitlang hmuna an huan lo ramte an neih lêt leh ngei theih nan hma lâkpui turin an ngen.

Memorandum-ah chuan, chhungkaw 18-te'n Aitlang ramah huan neiin, hun rei tak chhung an cheibàwl tawh leh eizawnna atana an innghahna a nih thu tarlangin, June 29, 2021-ah Assam police-te'n an hnehchhuh tih an tarlang a, "Kan ram chhung ngeiah police camp-te siamin an rawn inbéngbel a ni," an ti.

An huan thlaite chu Assam police-te'n tichhiain, hlo túr an kâp nghal zel tih sawiin, "Thâ leh zung tam tak sénga kan lo enkawl kan huan hetianga an sawisa hi kan rilru a na tak zet a ni," an ti a; an ram Assam police-te'n an chhuhsak zau zawng chu ṭín 80 leh a chanve vela zau a nih thu leh kum tin Rs. 20,00,000 chuang hû thlai an thar ṭhin thute an tarlang.

Aitlang hmuna an huante chu kum 50 chuang an enkawl tawh a ni tih sawiin huan neitute chuan, "Mizoram chhung ngei ni si, hetia Assam lamin min rawn hnehchhuh mai leh kan thlaite an suasam chiam mai hi a mak kan tiin hriatthiam a harsa kan ti tak zet," an ti a; hmalak ngaihna leh a kawnghmang an hriat loh avangin sorkar hmalakna an ngaichâng tawp mai tih an sawi.

July 9, 2021-a Assam leh Mizoram chief secretary-te inbia chu nghakhlel taka an ngaihchàn thu sawiin, "Hotu lian lam aṭangin hmalakna leh thu thar em em awm lo mah se, kan tan han chêt ngaihna a awm loh avang leh kan huanah takngial pawh kan feh ngam tawh loh avangin a hrilhhaithlak duh hle a ni," an ti.

Huan neitute chuan, July 24, 2021-a Shillong-a hmarchhak state CM-te inkawmna leh Assam CM nen ramri chungchanga inbiak tur thu an hriatin an thla a muang tih sawiin, "Kan huante pawh kan nei lêt leh thei ngei dawn niin kan ngai a, mahse, vawiin thlengin kan harsatna sutkian tumna leh kan mangannate a hmuna kan ram hruaitu liante'n min la hmuhpui miah lo hi a manganthlak kan ti hle a ni," an ti a; an huante chu an chán hlen thei hial mai dawna an hriat avangin CM hnenah an harsatna leh mangannate an thlen ta tih an tarlang.

"Kan ram chin humhalh tura Mizoram sorkar aṭanga hmalakna a awm thuai loh chuan keini bakah, a chhehvela huan leh dîl neitu tam tak pawhin an chán zel mai ang tih a hlauhawm tak zet a. Kan harsatna leh mangannate min hriatsak a, Aitlang, Vairengtea kan huan lo ramte kan neih leh ngei theih nan hma min lakpui turin kan ngen a che," tiin CM Zoramthanga an ngen a ni. Aitlanga huan neitute tarlan danin, Aitlanga an huanah kuhva leh hmunphiah an chíng tlangpui a; a ṭhenin sêr, khanghû leh thlai leh thei dangte an chíng tel bawk.