Kanhmun leh Damcherra inkalpawh thei

Mamit DC Dr Lalrozama chuan thuchhuah siamin, Disaster Manage­ment & Rehabilitation department-in an remtih angin thu leh awm hma chu Kanhmun (Mizoram) leh Damcherra (Tripura) chu phalna la loa inkalpawh phalna (free movement permit) pek a nih thu a tarlang.

Mamit bawrhsap tarlan danin, inkalpawh phal hun chu chawlhkar khatah Thawhṭanni leh Zirtawpniah chawhma dar 10 aṭanga chhawhnu dar 2 inkarah a ni.

Hemi hun chhung hian Damcherra aṭanga Kanhmuna lut turte tan mPASS a ngai lo a, thermal screening hmanga endik a ni ang. Kanhmuna lut zawng zawngte RAT hmangin endik an ni dawn lo a, Covid-19 symtom neite chauh endik tur a ni.

Damcherra aṭanga lehláng tura Kanhmuna lutte chu chawhnu dar 2 ral hma ngeiin Damcherra-ah an kîr leh tur a ni a, Kanhmun khaw chhung bak kal phal a ni lo. Kanhmun piah lama kal turte chu mPASS-ah an inziak luh hnuah medical screening kalphung pangai an paltlang a ngai.

Kanhmun aṭanga Damcherra-a kal (bazar) turte chu Kanhmun Village Task Force-ah phalna lak hmasak tur a ni a, a rei berah darkar hnih chhung hun pek an ni ang. Chawhnu dar 2 thleng hun pek a nih angin, darkar 2 a la ral lo a nih pawhin chawhnu dar 2 rîk hmain Kanhmunah kîr leh tur a ni. He phalna hian kêa kalte chauh a huam.

Hun bituk bawhchhia an awm chuan The Mizoram (Containment and Prevention of the Spread of Covid - 19) Act, 2020 (chapter II, clause 5 sub-clause 9)-in a tarlan angin Rs. 1,000 chawitir tur a ni a; pawisa chawi duh lo an awm chuan thla thum aṭanga kum khat thleng lung-ina tàntir theih a ni.

Free movement hun chhunga veivâkte chu Covid-19 laka invênnate zàwm tura hriattir an ni bawk.