Lungleia RTPCR Lab. din dan tur Buaipuitu tur committee din a ni
Mizoram sorkar chuan nimin khan notification tichhuakin, Gauhati High Court, Aizawl Bench thu angin Lungleia RT-PCR bun a nih theihna atana hma latu tur committee a din.
Committee-ah hian chairman chu Health & Family Welfare Principal Director a ni a, member secretary chu Hospital & Medical Education Director a ni. Member-te chu - Lunglei Civil Hospital Medical Superintendent, Lunglei Sub-Hqrs. YMA President leh Lunglei Ṭhalai Pawl Chief Organiser-te an ni.
Committee hi notification tihchhuah aṭanga ni sarih chhunga Tourist Lodge, Lunglei leh in dang awm sa, RT-PCR laboratory din theihna tur enfiah tura tih an ni a; sorkarin RT-PCR laboratory tur in a buaipui mek peih a nih hmaa laboratory din lailâwkna tura tih a ni.
An thil hmuh chhuah chu committee chuan Health & Family Welfare department-ah an thlen ang a, a ṭul angin hmalak zui a ni ang.
Tarlan tawh angin, Gauhati High Court chuan Lungleiah RT-PCR laboratory din tur leh hma la nghal turin August 4, 2021 khan Mizoram sorkar a hriattir a; Mizoram sorkarin chhim lam district-te'n RT-PCR laboratory an mamawh lo tih a lo tarlan tawh chu Court-in a pawm loh thu leh district dangah Covid-19 veite enkawlna damdawi-in din thuai turin a hriattir bawk.
RTPCR for Chhimbial chuan LH Lalzarzoliana, Lunglei hmingin kumin June thla tìr lam khan Gauhati High Court, Aizawl Bench-ah public interest litigation (PIL) an thehlut a, chhim lamah RTPCR khawl bun a nih theih nan hma la turin an ngen a ni.
PIL hi Justice Michael Zothankhuma leh Justice Nelson Sailo te ṭhutna Gauhati High Court Principal Bench chuan July 27 leh 28 khan a ngaihtuah a; August 4, 2021 khan thutlukna (judgement order) an tichhuak.
High Court chuan, judgement order chhuah aṭanga ni sarih chhungin Mizoram sorkara Health Secretary chu RTPCR laboratory dinna tur ngaihtuahtu tur committee siam turin a hriattir a; committee-ah chuan member pali aia tlem lo awm tur leh, member zingah chuan YMA Sub-Headquarters, Lunglei President leh Lunglei Ṭhalai Pawl Chief Organizer telh ngei turin a hriattir bawk a ni.