COVID-19: Mizoram dinhmun : Hripui vei 281 hmuh belh a ni

August 8, Pathianni khan Mizoramah Covid-19 vei mi 281 hmuh chhuah a ni a, tun hnai ni 27 kal ta chhunga hmuh chhuah tlem ber ní a ni. Nimin khan hripui laka fihlim tawh mi 419 chhuahtir an ni a, mi pakhat a thi.

Covid-19 vei hmuh tharte chu mipa 142 leh hmeichhia 139 an ni a; TrueNAT-PCR hmanga hmuh chhuah mi pathum leh Rapid Antigen Test hmanga hmuh chhuah mi 278 an ni. ZMC laboratory-ah swab sample endik a ni lo.

Hripui vei hmuh thar mi 281-te chu symptom nei 198 leh nei lo 83 an ni a; tualchhunga kái vek niin, kàina chin hriat loh mi 157 an awm. Mi 281 hmuh chhuah hi July 5, 2021 hnu lama hmuh chhuah tlem ber ní leh mi 300 aia tlem hmuh thar ní awm chhun a ni.

IDSP record angin, Mizoramah Covid-19 vei mi 44,520 hmuh chhuah a ni tawh a, mipa 23,209 leh hmeichhia 21,311 an ni. Nimin tlai dar 5 thleng khan mi 32,625 (73.28%) chhuahtir an ni tawh a, mi 168 (0.38%) thi tawhin, enkawl mek mi 11,727 (26.34%) an awm.

August 8, Pathiannia swab sample endik dan chu - TrueNAT hmangin Lunglei, Mamit leh Saitual district-a mi 27 leh RAT hmangin district parukah 1,361 a ni a, a vaiin sample 1,388 niin, hripui vei hmuh chhuah 281 chu 20.24% a tling. Positive percentage hi TrueNAT-ah 11.11% leh RAT-ah 20.42% a ni.

Covid-19 positive hmuh chhuah zat hi Aizawl district-ah mi 196, Kolasib district-ah 29, Lunglei district-ah 27, Lawngtlai district-ah 19, Mamit district-ah pariat leh Champhai district-ah mi pahnih an ni a; Aizawla veng 42 leh khaw dang 20-a mite an ni.

Hripui vei hmuh thar mi 281 zingah naupang kum tling lo 75 aia tlem lo awmin, an zinga 50 velin symptom an nei a; nausén kum khat tling lo paruk awmin, an zinga pangain symptom an nei. Kum 60 chung lam 20 vel awmin, an zinga mi 13-in symptom an nei a, a upa ber kum 93 mi pawh symptom nei a ni.

August thlaah ni riat chhungin Mizoramah Covid-19 vei mi 5,596 hmuh chhuah a ni tawh a, chawhrualin ni tin mi 699.5 hmuh chhuah an awm ang a ni. Mizorama Covid-19 vei hmuh tawh zat 44,520 chu kum 2011 chhiarpui angin, Mizorama mi 1,000 zelah hripui vei mi 40 an awm ang a ni.

Nimin khan tlai dar 5 thlengin hripui laka fihlim tawh mi 419 chhuahtir an ni a; Aizawl district-ah mi 245, Kolasib district-ah 86, Mamit district-ah 33, Siaha district-ah 29, Lawngtlai district-ah 19, Champhai district-ah paruk leh Saitual district-ah mi pakhat an chhuak.

IDSP tarlan danin, August 8, 2021 thlengin Mizoramah swab sample 6,81,436 endik a ni tawh a, chu'ng aṭanga Covid-19 vei hmuh tawh zat 44,520 chu 6.53% a ni. Hripui vei hmuh tawh zinga mi 40,271 chu Mizoram chhunga kái chhâwng an ni a, mi 4,249 chu Mizoram páwn aṭanga an rawn luh hnua hmuh chhuah an ni.