KHAWTHLIR

Tanpuina hlan
Mizoram Engineering Service Association (MESA) chuan ramri hrûl khaw hrang hrang leh police hnenah nimin khan ṭanpuina an hlan. MESA hian Mizoram police hnenah Rs. 1,43,000, puan-in (tent) pali leh tui tihthianghlimna (filter) panga, Vairengte khawtlang hnenah Rs. 1,00,000, Phainuam, Saihapui-V, Kanhmun leh Chuhvel khawtlang hnenah Rs. 25,000 ṭheuh an pe a ni.

Thisen pe
Mizoram Police Wives Welfare Association, Serchhip unit chuan an din champha vawi rukna pualin nimin khan Serchhip District Hospital Blood Bank-ah thisen an pe a, mipa pali leh hmeichhia pathumte'n thisen unit sarih an pe a ni.

Exam dan tur rêl
Mizoram-a officer te, Mizorama college principal pawl hruaitu te, Mizoram College Teachers’ Association hruaitute leh Pachhunga University Teachers’ Association hruaitute chu nimin khan MZU Examinations department-ah an ṭhukhawm a; MZU hnuaia odd semester exam dan tur an sawiho. Covid-19 leng kara exam neih dan tur hrang hrang an rèlte chu pawmpui turin MZU vice chancellor Prof. KRS Sambasiva Rao hnenah an pe nghal a ni.

Lirthei lo lut zel
Mizoram leh Assam ramria inkahna a thlen hnua Assam hoin Mizorama lut tur lirtheite hun eng emaw chen an dan hnuah August 7, 2021 zan aṭangin Mizoramah lirthei a lut ṭan a, nimin lamah chuan lirtheite harsatna awm loin a rawn lut chhunzawm zel. Vairengte aṭanga Vanglaini thu dawn danin, tun dinhmunah chuan lirtheite chu tun hma angin a pangngaiin a rawn lut leh tawh a ni.

Test kit a thleng
Health minister Dr R Lalthangliana chuan, ZMC laboratory-ah RT-PCR hmanrua a chatlak hnuah nimin khan test kit eng emaw zat a rawn thleng tih a tarlang. Health Minister-in Twitter-a a tarlan danin, test kit rawn thleng hi VTM 20,000, RNA extraction kit 20,000 leh RT-PCR kit 20,000 a ni a, nimin khan ZMC-ah phurh thlen nghal a ni.