Mizoram sorkarin economic blockade A hmachhawn dan MLA-in duhkhawp lo

Hachhek bialtu MLA Lalrindika Ralte chuan nimin khan Mizoram leh Tripura inrìna Langkaih lei leh Kanhmun a tlawh a; Assam-in kawngpui danga economic blockade an kalpui chungchang Mizoram sorkarin a hmachhawn dan a duhkhawp loh thu a sawi.

Lalrindika Ralte chuan, India rama chengte chu India ram danpui hnuaia awm leh chumi anga enkawl an ni tih sawiin, "Constitution Article 19(d) chuan chiang takin India mi (citizen)-te chu khawi hmunah pawh zalên taka kal theihna fundamental right min pe. Article 304-naah chuan insumdawn tawnna kawng khâr thei tur dan chu Parliament-ah emaw, state legislature-ah emaw pawh ni se, India President phalna la hmasa lo chuan ngaihtuah tura thehluh a rem lo," a ti.

Assam lamin Mizote fundamental right kalha kawngpui an dan chu sorkar laipui enkawl national highway a nih thu sawiin Lalrindika chuan, "Harsatna min thlen miah lo pawh ni se dan bawhchhiatna lian tak a nih avangin kan enliam mai mai tur a ni lo a, kan chanvo chang turin theihtawp chhuahin kan bei tur a ni," a ti a; hmalakna dang hriat tur awm si loa mangang lutuk anga lang lo turin mipui an duh nia ngaih theiha chanchinbu leh social media lama lang chu mipui aiawh sorkar ngaihdan tura a ngaih loh thu a sawi.

Lalrindika Ralte chuan, Mizoram châk lâkna kawngpui dan chu ramri buaina nen a dang daih tih sawiin, "Hetiang em ema kan ṭhenawm state-in kan fundamental right an palzût chung pawha kan right humhalh nana chêt aia tuar hram hram tura mipui infuih zawk hi thil nihphung tur niin ka hre lo. Ni 10 chuang national highway dan a ni chunga a kawng neitu leh enkawltu sorkar laipui a ngawi tlat hi hriatthiam a har hle bawk a ni," a ti.