Electric bill sang vangin mipui an mangang - Congress ṭhalai

Mizoram Pradesh Youth Congress Committee (MPYCC) chuan, Mizorama electric bill tihsan dan chu a sang uchuak bakah a felhlel a, mipui an mangang hle niin an tarlang.

MPYCC thuchhuah tarlan danin, MNF hruai sorkar ruahman ang chuan electric bill chu 41.92%-a tihsan tur a ni a, mahse, JERC-in a punna tur chu tihniamin, 20.68%-in tihpun a ni ta zawk a ni. Electric bill a pun bakah, petrol-ah 5% leh diesel-ah 2.5%-in chhiah tihpun a ni bawk.

Congress ṭhalaite chuam, state dang sorkarte'n mipui thlamuanna turin ruahmanna thar an siam tih sawiin, "Sorkara chàwi tur bill an ngaihhnathiam a, rualawh a na hle a ni," an ti a; Mizoramah erawh chuan bill leh chhiah a pun avangin mipui tan phurrit a tlin tak meuh thu an sawi.

Electric bill thar chu mi tin mai mak tih khawpa sang leh felhlela ngaih theih a nih thu sawiin MPYCC chuan, "A lungchhiatthlak kan ti hle. Lockdown avanga dawr khâr, electric main switch-a off thlapte pawh bill sang hian a kal kân bik lo. Electric bill hi a hmuna reading la loa rin thua siam a nih avangin dik lo, bill tam uchuak a tam phah hle a ni. Tuna bill dawn mekte hi thla hmasa bill aia a lêt hnih/thuma tam a awm nual a ni," an ti.

MPYCC chuan, sorkar sum nei tawh lo mangangin electric bill leh tuialhthei hmanga sum tuak a tum zawk tih mipui hrilh turin Power & Electricity Minister an phût a, "Mi tam tak mangang leh lungngaiin an rûm a, an lungngaihna leh manganna belhchhahna tura electric bill sang uchuak leh felhlel lo thleng hi demawm kan ti hle a ni," an ti a; Mizoram sorkar chu electric bill a rang thei ang bera ennawn tur leh Covid-19 len chhung chu bill pung hmang lo turin sorkar an phût a ni.

Congress ṭhalaite chuan, Covid-19 léng avangin Mizoram ei leh bar dinhmun a tlahniam a, hun rei tak lockdown avangin mipuiin sum deh chhuahna kawngah an tuar na hle tih sawiin, "Dinchhuah leh ngaihna awm lo khawpin ṭhenkhat chu mangangin an rûm mek a ni. Manganga kan rûm a, hripui ûm bo nan tia mi tinin kan theihna zâwnah sorkar kan thláwp a, a kaw tàwpah mipui kan ṭang tawh a ni," an ti.