Sports Minister hian dawt sawi sim tawh rawh se: ZPM Thalai

ZPM party ṭhalaite chuan thuchhuah siamin, Sports & Youth Services minister Robert Romawia Royte chu Hnahthiala phùl lem phah mek a tlawhnaah thu dik lo sawiah an puh a, dâwt sawi sim turin an chah.

ZPM Ṭhalai chuan, August 7, 2021-a Sports Minister-in Hnahthial khelmuala phùl lem phah a en ṭuma a sawi, infiamna ruhrel an dinnaah Mizoram sorkar sum hman a nih loh thu a sawi chu dâwt chiang tak niin an tarlang a, "Kum 2020-21 budget pharha Sport department tana sum dah bakah, Sport department tana Finance department-in sum a pek belh ringawt pawh nuai 1,474.43 a ni a, NEC grant aṭangin nuai 189, Special Central Assistance aṭangin nuai 788, SEDP aṭangin nuai 487.64 leh state fund aṭangin nuai 9.79 a ni," an ti.

Robert Romawia Royte-in hripui ûm bona tura phùl lem an phah sauh sauh thu a sawi nia sawiin ZPM Ṭhalai chuan, "Mipui a barakhaih hle a, phùl lem phah hmanga hripui ûm bo tawh ram pakhat tal sawi tur a hriat chuan mipui hriata sawi turin kan phût," an ti a; ram hruaituin mipui hriata chiang taka dâwt an sawi chu mipui zah lohna a nih thu an tarlang.