MIMA-in dawr hawn dan siam rem an duh

Mizoram Merchant Association (MIMA) chuan, sumdawngte harsatna hriata Mizoram sorkarin dawr hawn hun leh hna thawh theihna hun a siam chu lawmawm an tih thu an sawi. Chutih rualin, dawr hawn dan chu group A, B leh C-ah ṭhen loin, A leh B-ah ṭhenin, dawr inkar thlaka hawn ni se a him zawk tura an ngaih thu an tarlang.

MIMA chuan, tuna kal danah chuan dawrte chu bungraw zawrh dan (item wise)-a ṭhen a nih thu sawiin, "Item ṭhenkhat chu a hlâwma awm a nih avangin inhnaih tak takin an inhawng vek mai dawn a, hei hi himna kawngah a fuh lo deuh zawk dawnin a lang. Chuvangin, A leh B (dawr inkarthlak)-a siam tawp hi a him zawk dawnin a lang a, sumdawngte'n kar khatah ni thum hna an thawk thei bawk dawn a ni," an ti.

Sumdawngte'n hripui an hlau a, an fimkhur hle tih sawiin MIMA chuan, "Dawr nghaktute'n mask kan hrêng ṭha a, sanitiser kan chhawp reng bawk. Doctor rualin, 'Dawr hmun hi hri inkai darhna a ni lo,' an tih hi pawmawm kan ti a, kum 2020 aṭanga ni tina inhawng ṭhin damdawi zuar leh essential commodity zuarte hian hri hi a kai darh lo hle a ni," an ti a; hei vang hian lockdown bura hri do loin, SOP zawm ṭha chung leh nunphung dika awmin sumdawngte leh hna dang thawktute hna thawhna hun siam an mamawh thu an sawi.

MIMA chuan, ramri chungchanga Mizoram sorkar hmalak dan chu lawmawm an tih thu leh an theihna zawnah sorkar thlàwp tlat an tum thu an sawi a; Assam-ah NH-306 dan leh rél kawng tihchhiat chu an dem thu te, Mizo lirtheite chunga Assam sorkar chêt dan an dem thute an tarlang bawk.