Ramri buaina hi Mizo leh hnam dang buaina a ni lo: Kolasib DC

Kolasib DC Dr H Lalthlangliana chuan nimin khan a pisaah thuthar thehdarhtute a kâwm a; ramria buaina thleng chu Mizo leh hnam dang (non Mizo) inkara boruak ṭha lo siamtu ni lo tura a duh thu a sawi.

Dr H Lalthlangliana chuan, ramria buaina thleng avanga lirthei lut turte'n harsatna an tawh chuan ziaawm lam a pan tawh thu a sawi a, "Tukin (August 9) zing dar 10 thleng khan Vairengte police checkgate paltlang lirthei 473 a awm. Heng zinga 131 chu bungraw phur truck lian niin, LPG phur pali leh oil phur 30 an ni. Silchar-a tangkhang Mizo truck leh lirthei dangte pawhin tukin khan Vairengte an paltlang tawh," a ti.

Ramri-ah sorkar leh sorkar indawrna thila harsatna thleng a nih thu sawiin Kolasib DC chuan, "He buaina hi Mizo leh non-Mizo inkar emaw, Mizo leh Assamese inkar a ni lo. Lirthei lo lut chho mekte pawh ṭha taka lo mikhual a, hnam dang hnathawk kan chhawrte chungah pawh harsatna siam zawnga khawsa lo turin mipuite kan ngen a ni," a ti a; Mizoram hmél tibâl thei zawngin mimal leh páwl hrang hrangte hma la lo turin a ngen.

Kolasib DC chuan, hripui léng donaah an district chhungah chuan inkaihhruaina (SOP) ngai hman chhunzawm tur a nih thu a sawi a, "Executive duty leh VTF-te pawh an duty-na ngaiah an duty chhunzawm dawn a ni," a ti.