FCSCA-in rél kawng chhiat vangin Buhfai lak luhna dang an ngaihtuah

Food, Civil Supplies & Consumer Affairs (FCSCA) department chuan, Mizoram leh Assam ramri buai kaihhnawihah Assam mite'n Bairabi rél kawng an tihchhiat avangin buhfai lak luhna kawng dang an ngaihtuah. Hetih lai hian, rél kawng chhia hi siamṭhat a ni tawha thu dawn a ni.

Vanglaini palai zawhna chhangin FCSCA minister K Lalrinliana chuan, Baira­bi kaltlanga buhfai lak luh theih a nih loh hnuah kawng dang an dap nghal tih a sawi a, "Rél hmangin Bairabi kaltlanga buhfai hi lak luh ber a ni a, lak luh theih a nih tâk lohah chuan kawng dang dap nghal chuk chuk a ngai. Bairabi kaltlang lo hi chuan buhfai tlem azawng motor-in lâk luh a ni," a ti.

K Lalrinliana chuan, Food Corporation of India (FCI) hnenah Tripura-a Dharmanagar rél chawlh­hmun aṭanga buhfai lak luh an dil thu sawiin, "FCI lamin rem an lo ti nghal a, a lawmawm tak zet. A phurhna rate-te kan buaipui chho mek a, a hminga tender koh vete a ngai a ni," a ti a; Dharmanagar aṭanga buhfai phur lut turin release order an neih hman tawh thu a sawi.

FCSCA Minister chuan, Tripura lam aṭanga buhfai phur turin harsatna a awm lo tih sawiin, "Chief Minister-in Tripura lam kawng a ngai pawimawh a, leite an thuam chak a ni. Chuvangin, Bairabi lam aṭanga a phurh theih loh chuan harsatna awm loin kan phurh theih kan ring," a ti.

Bairabi rél kawng a ṭha leh tawh tih report an dawn thu sawiin K Lalrinliana chuan, "Hetiang a nih tâkah chuan Bairabi lam aṭangin nge, Dhamanagar lam aṭangin buhfai min rawn pek dawn tih buaipui a, lo zâwt chiang turin department hotute kan inti mek a ni," a ti a; rél kawng chhiain buhfai bâkah, ni tin mamawh dang lak luhnaah harsatna a awm phah loh thu a sawi.

FCSCA Minister sawi danin, tun dinhmunah chuan Mizoramah buhfai chhêk khâwl sa a ṭha tâwk rih a; buhfai lâk luh ni rih lo mah se, harsatna a awm rih lo tura ngaih a ni.