Electric bill kalphungin sawi a hlawh : Ṭhenkhat a pung, ṭhenkhat a tlahniam : Bill siam dan kan puangzar ṭha: PE Dept

Tun hnaia electric bill tihsan leh bill kal zatah lungawi lohna thâwm a ring hle a; mi ṭhenkhat chu nasa takin an bill a pun laiin, a hma aia bill tlem zawk an awm nual bawk. Power & Electricity Engineer-in-Chief (E-in-C) chuan, kawlphetha hman man tihsan a nih dan leh hripui léng avanga meter en (reading) loa bill an siam dan chu an puangzar ṭhaa an ngaih thu a sawi.

Sorkar kalphung pangngai angin kum kal meka sorkar kum thar, April 2021 aṭangin kawlphetha hman man tihpun a ni.

Hemi chungchangah hian Power & Electricity department E-in-C Lalduhzuala chuan, Joint Electricity Regulatory Commission (JERC) a awm hma chuan power tariff chu state sorkarin a bithliah ṭhin thu sawiin, "JERC a awm hnuah chuan JERC bituk angin tariff siam a ni a, kum 2010 vel aṭang khan kum tin JERC-in tariff thar a siam ziah a ni," a ti.

Power & Electricity E-in-C sawi danin, kawlphetha hman man tur chu department-in kum tin a ruahman a, chu chu state sorkarin a pawm hnuah JERC-ah thehluh a ni. JERC chuan mipui a ràwn hnuah power tariff thar a tichhuak ṭhin a; kum 2021-22 atan power tariff chu 20.68%-in a pung.

PE department-in a tarlan tawh dan chuan, kumin April thla bill (June thlaa consumer hnena pek) chu dan pangngaiin consumer-te hnenah (inah) an la sem a; May thla bill (consumer hnena July-a pek) leh June thla bill (August thlaa tihchhuah) erawh chu Covid-19 hripui darh nasa leh total lockdown avangin meter reading ti loin, a hma thla thum chhunga bill zat chawhrual angin bill an siam a ni.

Hetih lai hian, electric bill nasa taka pung consumer tam tak an awm a, lungawi lohna thâwm pawh a ring hle a; political party-a eptu pawl ṭhenkhat chuan sawiselna thuchhuah an tichhuak tawh bawk.

Electric bill pung chungchangah hian Vanglaini palai zawhna chhangin PE E-in-C Lalduhzuala chuan, power tariff tihpun a nih dan leh Covid-19 lêng vanga meter reading tih a nih loh dan chu an sawifiah tâwka an hriat thu a sawi a, "Kan phak ang tawkin kan puangzar ve a. A tlangpuiin tihdik loh lutuk a awm loin kan hria," a ti.

PE department E-in-C chuan, Covid-19 léng avangin inah mi an awm tam a, an kawlphetha hman pawh a hma aiin a tam zawk a nih a rinawm thu leh phai aṭanga kawlphetha an lak luh pawh a hma aiin a tam thu a sawi a; electric bill dik lo nia hriate tan complaint thehluh theih reng a nih thu a sawi bawk.