Hripui vangin mi 3 an thih belh

August 9, Thawhṭanni zan khan Covid-19 vangin mi pahnih an thi a, nimin khan mi pakhat a thi. Mizorama hripui vanga thi chu mi 171 an tling tawh a, August thla bikah mi 23 an thi tawh.

August 9, Thawhṭanni zan dar 7:40 khan Laituah­ziri (90) w/o Lawizuama , Chawngte-P Kanaan Veng chu Covid-19 vangin an inah a thi a, nimin zing dar 9 khan vui a ni. Thu dawn danin, Laltuahziri hi hripui vei a ni tih August 4, 2021 khan hmuh chhuah a ni a, Alzheimer natna nei sa niin, an chhungkuaah hripui vei an awm ve bawk avangin inah an inenkawl a ni.

Thawhṭanni zan vek dar 9:10 khan Zonunsanga (47) h/o Lalhmangaihi, Zemabawk North chu hripui vangin SRH-ZMC-ah a thi. Zemabawk North YMA Secretary sawi danin, Zonunsanga hi zunthlum nei sa a ni a, damdawi-ina a luh hnua thin (liver) ṭha a nei tih hmuh chhuah a ni. Covid-19 positive a ni tih August 6, 2021 khan hmuh chhuah niin, August 7-ah SRH-ah dah luh a ni a; zanah lumen niin, nimin chawhma dar 10 khan vui a ni.

Nimin chhun dar 1 khan Covid-19 vei SRH-ZMC-a enkawl lai Zoziki (98) m/o K Thangmawia, College Veng, Aizawl a thi a, hripui vanga thi 171-na a ni. Mizorama hripui vei thi zinga upa ber a nia hriat a ni a, nimin tlai dar 4 khan an venga Godfrey Tower Hall-ah vui a ni. Covid-19 positive a ni tih July 3, 2021 khan hmuh chhuah niin, SRH-ZMC-ah admit nghal a ni a; thisen sang nei sa a nih thu khawtlang hruaitute'n an sawi.