COVID-19: Mizoram dinhmun : Hripui vei 937 hmuh belh a ni

August 9, Thawhṭanni khan Mizoramah Covid-19 vei mi 937 hmuh chhuah a ni a, August thla chhungin mi 6,533 hmuh chhuah a ni tawh. Nimin khan hripui laka fihlim tawh mi 417 chhuahtir an ni a, Thawhṭanni zan leh nimin khan mi pathum an thi.

Covid-19 vei hmuh tharte chu mipa 439 leh hmeichhia 498 an ni a; ZMC laboratory-a hmuh chhuah 166, TrueNAT-PCR hmanga hmuh 72 leh Rapid Antigen Test hmanga hmuh 699 an ni.

Hripui vei hmuh thar mi 937-te chu symptom nei 437 leh nei lo 500 an ni a; tualchhunga kái 935 leh state pawn aṭanga tun hnaia rawn lut pahnih niin, tualchhunga kái zingah kàina chin hriat loh mi 385 an awm.

IDSP record angin, Mizo­ramah Covid-19 vei mi 45,457 hmuh chhuah a ni tawh a, mipa 23,648 leh hmeichhia 21,809 an ni. Nimin tlai dar 5 thleng khan mi 33,271 (73.19%) chhuahtir an ni a, mi 171 (0.38%) thi tawhin, enkawl mek mi 12,015 (26.81%) an awm. 

August 9, Thawhṭannia swab sample endik dan chu - ZMC laboratory-ah 2,916, TrueNAT hmangin district pakuaah 298 leh RAT hmangin 4,519 a ni a, a vaiin sample 7,733 niin, hripui vei hmuh chhuah 937 chu 12.11% a tling. Positive percentage hi ZMC-ah 5.72, TrueNAT-ah 24.16 leh RAT-ah 15.46% a ni.

District hrang hranga Covid-19 positive hmuh chhuah zat chu - Aizawlah mi 600, Kolasib-ah 103, Lawngtlaiah 74, Lungleiah 54, Mamitah 51, Champhaiah 36, Siahaah 14, Serchhipah pali leh Hnahthialah pahnih an ni.
Hripui vei hmuh thar mi 937 zingah nausen kum khat tling lo pakua awmin, symptom nei an awm nual a, a naupang ber chu thla khat mi a ni a; a upa ber chu kum 93 mi niin, symptom a nei. 

August thlaah ni kua chhungin Mizoramah Covid-19 vei mi 6,533 hmuh chhuah a ni tawh a, chawhrualin ni tin mi 725.89 hmuh chhuah an awm ang a ni. Mizorama Covid-19 vei hmuh tawh zat 45,457 chu kum 2011 chhiarpui angin, Mizorama mi 1,000 zelah hripui vei mi 41 an awm ang a ni.

Nimin khan tlai dar 5 thlengin hripui laka fihlim tawh mi 417 chhuahtir an ni a; Aizawl district-ah mi 290, Lawngtlai district-ah 45, Champhai leh Kolasib district-ah 28 ve ve, Lunglei district-ah 11, Mamit district-ah 10, Siaha district-ah pali leh Khawzawl district-ah pakhat an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 11,858 hmuh chhuah a ni tawh a, TrueNAT-PCR hmangin 2,666, RAT hmangin 30,932 leh Guwahati-ah pakhat hmuh chhuah a ni tawh.

IDSP tarlan danin, August 9, 2021 thlengin Mizoramah swab sample 6,89,169 endik a ni tawh a, chu'ng aṭanga Covid-19 vei hmuh tawh zat 45,457 chu 6.60% a ni. Hripui vei hmuh tawh zinga mi 41,206 chu Mizoram chhunga kái chhâwng an ni a, mi 4,251 chu Mizoram páwn aṭanga an rawn luh hnua hmuh chhuah an ni.