KHAWTHLIR

Tanpuina hlan
Mizoram Pharmacists’ Association chuan Mizorama Covid-19 vei, a bikin thingtlanga cheng, damdawi leh mamawh lam khawmna buaithlak deuhte hnena sem chhuah turin nimin khan damdawi, pulse oximeter leh thil dang ṭhahnemtak Health minister Dr R Lalthangliana hnenah an hlân. Bungrua leh damdawi leina turin MPA member-te'n Rs. 3,11,200 an thawh khawm a, CMO-te kaihhruaina hnuaiah district tina pharmacist te, khaw hrang hranga medical team leh task force-te nen ṭang tlangin sem dan tur ruahman a ni.

Hmalakna thlir lêt
Serchhip District Task Force on Beti Bachao Beti Padhao (BBBP) chu nimin khan an chairman Kumar Abhishek, DC hoin an ṭhu a, BBBP Action Plan 2020-21 first phase hmalak mekte leh hmabakte kalpui dan tur an sawiho. First phase chhunga hmalak tawhna - BBBP Photography Competition, training kalpui tawhte leh media campaign neih tawhte thlir lêt a ni a; hripui léng kara hmalaknate chu a ṭha thawkhata an ngaih thu an sawi.

Tanpuina sem
AMC ward-III councillor C Lalchhandami chuan a thawh 12-na atan nimin khan a bial chhung - Ramhlun North, Ramhlun Venglai, Ramhlun Vengthar, Ramhlun Sports Complex leh Laipuitlanga YMA branch-te'n an venga khawsak harsa chhungkaw 100 an thlante hnenah mamawh chi hrang hrang a sem. Ration kit a semte chu India's Crypto Covid Relief Fund & Every Infant Matters, New Delhi aṭanga hmuh a ni.

MZU hnuaia Exam dan tur rêl
Mizoram-a officer te, Mizorama college principal pawl hruaitu te, Mizoram College Teachers’ Association (MCTA) hruaitute leh Pachhunga University Teachers’ Association (PUCTA) hruaitute chu Thawhlehni khan MZU Examinations department-ah an ṭhukhawm a; MZU hnuaia odd semester exam dan tur an sawiho. Covid-19 leng kara exam neih dan tur hrang hrang an rèlte chu pawmpui turin MZU vice chancellor Prof. KRS Sambasiva Rao hnenah an pe nghal a ni.