Virtual seminar-ah Commerce Minister a tel

Confederation of Indian Industry (CII) leh Software Technology Park (STPI)-te hmalaknain nimin khan India kum 75 tlin lawmna tur pualin ‘Economic Development in North East -Challenges, Opportunities and The Way Forward’ tih thupui hmangin virtual seminar buatsaih a ni a, Commerce & Industries minister Dr R Lalthangliana a tel.

Dr R Lalthangliana chuan, kum 1947 aṭanga kum 1986-a Mizoram state nih lai dinhmun leh tun thlenga a ṭhan dan leh hma a sawn dante a sawi a, "Kum 20 lai inkhuahkhirhna hnuaia Mizoram a awm hnua tuna hmasawnna tam tak, a bikin agriculture, horticulture, handloom, game developer, entertainment industry leh nursing lamah kan ṭhang chak hle," a ti a; Mizo ṭhalai tam takin sorkar hna an indaih tawh lohna phuhrûk nan STPI hotute chu nasa taka sorkar hma lâkpui turin a sáwm.

Commerce & Industries Minister chuan, Mizoram leilung chu hmasawnna tur tam tak a awm tih sawiin, "Kan border state-te hi hmang ṭangkaiin ṭhalaite hmasawnpui tur tam tak an neih theih ngei ka ring. Bangladesh nena insumdawn tawnna tura hma lak mek a ni. Commerce Minister Tipu Munshi sawmna angin March 2021 khan Bangladesh-ah ka zin a, border trade kalpui na tura hmalak zel a ni dawn," a ti.

Minister hian industry lamin nasa taka hma a sawn theih nan sorkar pawn theihtawp chhuaha policy lama hmalaknate, ease of doing business a bikin single window system lama theih tawp a hma an lak thu a tarlang bawk.

Virtual conference-ah hian Tripura dy. chief minister Jishnu Dev Verma Intervention for Growth of Jurisdictional STPI (North East & West Bengal) director Prabir Kumar Das leh CII NE Council co-chairman Reep Hazarika-te pawh an tel.