Electric bill siamṭha turin sorkar phût

BJP, Mizoram Pradesh chuan thuchhuah siamin, electric bill thar chu a tam uchuak hle niin an tarlang a, siamṭha turin sorkar an phût.

BJP chuan, "Covid-19 hripuiin mipui min nghawng lai leh eizawnna kawngah harsatna kan tâwk a, eichawp zawng mi retheite'n sumah harsatna kan tawh mek laia electric bill July thla aia tam uchuak taka rawn kal hi mipui tan phurrit siam nawnna a ni a, a rapthlak kan ti tak zet a ni," an ti.

Electric bill chu sorkarin sum tuakna atan a hmang em ni tih chu an zawhna a nih thu sawiin BJP chuan, "Cheng nuai chuang chhung khata an bill te, sing tél an bill-te hi domestic bill-ah chuan thil inhmeh lo tak a ni. State tam takah electric bill leh tui bill-te a thlàwn deuh thawa an tih tawh laia kan state sorkarin nasa taka tipungin, miretheite min nghaisa a ni," an ti a; a rang thei ang bera ennawna siam ṭha turin Mizoram sorkar an ngen a ni.