SYS Minister-in khelmual siam mek a tlawh

Sports & Youth Services minister Robert Romawia Royte chuan nimin khan Lengpuia MSSC Mini Sports Complex hmuna football field-a phûl lem phah mek tlawhin a enfiah. Phûl lem phahna atan hian Khelo India sum nuai 500 ruahman a ni.

Robert Romawia chuan, Covid-19 léng kara Lengpui field siam puitlin a ni chu lawmawm a tih thu sawiin, "Lengpui GSA-te nghahhlelh ang ngeiin naupangte leh ṭhalaite'n ṭangkai taka an hman theih tura ruahman a ni ang," a ti.

MSSC engineer-te tarlan danin, khelmuala phûl lem phah chin chu a dung metre 110 leh a vâng metre 74 a ni a, a sir kual chhuakin footpath metre 2 awmin, chu chu paver block hmanga kualkhung leh a ni. Football field siam hna bik chu zawh a ni tawh a, pavillion leh compound light system buaipui mek niin, August 2021 chhungin zawh theih beisei a ni.

Nimin vek khan Sports Minister hian Muallungthu MSSC Complex-a Khelo India sum nuai 550 sénga hockey khelmual leh phûl lem phah mek leh cheng nuai 500 sénga football khelmuala phûl lem phah tur a tlawh bawk a; Aizawl hnaivai hmun remchanga FIH standard hockey field leh FIFA standard football field awm dun chu infiammite tan a hlu hle dawn tih a sawi.

SYS Minister hi Aizawl South-III bialtu MLA Prof. F Lalnunmawia, Mamit bialtu MLA H Lalzirliana leh AMC councillor David Zohmangaiha ten an ṭawiawm a ni.