OKM Home-ah hripui vei 116 hmu

Health minister Dr R Lalthangliana hmalaknain nimin khan Integrated Disease Surveillance Programme (IDSP) chuan Operation Kingdom Ministry Home, Phunchawngah swab sample endik rûnpui an buatsaih a, home-a awm mi 151 endik zingah Covid-19 vei mi 116 hmuh chhuah niin, positivity rate chu 76.82% a ni. IDSP state nodal officer Dr Pachuau Lalmalsawma chuan, negative rihte pawh an vil zui dawn tih a sawi.

Swab sample endik rûnpui hi Aizawl khawpuiah neih mek zel a ni a; Thawhṭanni khan veng pangaa sample 4,716 endik aṭangin hripui vei mi 44 (0.93%) hmuh chhuah a ni. Nimina endik rûnpui dinhmun kan hre hman lo thung.

Thawhṭannia sample endik rûnpuia Covid-19 positive hmuh chhuah dan chu - College Venga mi 406 endik aṭangin mi 19 (4.67%), Dawrpuia mi 985 endik aṭangin mi 11 (1.11%), Tlangnuam Vengthara mi 959 endik aṭangin mi pasarih (0.72%), Chawlhhmunah mi 909 endik aṭangin mi paruk (0.66%) leh, Mission Venga mi 1,457 endik aṭangin mi pakhat (0.06%) a ni.