Mizoram Larsap Haribabu Kambhampati Damloh chhunga hmui tur Brig Dr Mishra

Mizoram Governor Dr Haribabu Kambhampati (68) chu a hriselna dinhmun avangin a chawlh rih a ngai dawn a, a chawlh chhunga Mizoram Governor tura ruat Arunachal Pradesh Governor ni lai Brig.Dr BD Mishra chu nimin khan Mizoram Governor atan lak luh a ni.

Mizoram Larsap atana July 19, 2021-a lak luh Dr Haribabu Kambhampati chawlh chhunga Mizoram Governor tura President-in a ruat Brig.Dr BD Mishra (Rtd) hi Gauhati High Court judge Justice Michael Zothankuma chuan Raj Bhavan Durbar Hall-ah rinawmna thu tiamtirin a la lut a ni.

Governor thar lak luhnaah hian chief minister Zoramthanga, deputy chief minister Tawnluia, Assembly speaker Lalrinliana Sailo, minister te, chief secretary Lalnunmawia Chuaungo, DGP SBK Singh, political party leh NGO hruaitute an tel.

Vanglaini thu dawn danin, Mizoram Governor 22-na Dr Haribabu Kambhampati chu tun hnai khan Hyderbad-ah a lung (heart) zai a ni a, a chêt theih loh chin tur hriat a nih loh avangin, a chawlh chhunga Mizoram Governor hna hmui tur ruat a ni.

Mizoram Governor 23-na Brig.Dr BD Mishra hi Kathauta, Bhadohi district, United Provinces of British India (tuna Uttar Pradesh)-ah a piang a, a nupui Neelam Mishra nen fapa pakhat leh fanu pakhat an nei. Zirna lamah M.A (Allahabad University), M.Sc. (Madras University), LLB (University of Delhi) leh Ph.D (Jiwaji University, Gwalior) a ni.

December 17, 1961-ah sipai officer a ni ṭan a, July 31, 1995-ah a châwl. Sipai hotu huaisen leh hlawhtling tak a ni a; indona hmunah a hmatáwngah awm tawh ṭhinin - Sino-Indian War, Indo-Pakistani War 1965 leh Bangladesh Liberation War-ahte a tel.

April 24, 1993 khan NSG (Black Cats) commander a ni a, Raja Sansi Airfield, Amritsar-ah Indian Airlines thlawhna mi firfiakte'n an hruaikawi (hijack) chu chhan chhuakin, thlawhnaa chuang khualzin leh thawktu mi 124-te chu him takin an la chhuak a ni.

Brig. Dr BD Mishra hi October 3, 2017 khan Arunachal Pradesh Governor atan lak luh a ni.