Electric bill siamṭha leh turin ZPM-in Power Minister an ngen

Zoram Peoples Movement (ZPM) chuan nimin khan Power & Electricity minister R Lalzirliana hnenah July 2021 electric bill siamṭha tura ngenna an thehlut a, "Hetianga mipui nam­nûlna leh phurrit siam hi chhunzawm tawh lo tur leh bill hi siamṭha ngei turin kan ngen a che," an ti.

ZPM party chuan thuchhuah siamin, Joint Electricity Regulatory Commission (JERC)-in bill ennawna tihpun a tum thu March 2021-a public notice a siamah an party chuan hripui léng avangin tipung rih lo turin rawtna ziakin a thehlut tih an tarlang a, "JERC-in ngaihdan sawihona public hearing March 19, 2021-a a neih khan ZPM aiawhte chu hmaichhana bill tihsan dodal thu sawi awmchhun kan ni," tiin, ZPM chu páwl leh mimala rawtna thlentu awm chhun an nih thu an tarlang.

Mizoram sorkarin electric bill chu 75% laia tihsan rawtna JERC hnenah a thlen tih tarlangin ZPM chuan, "JERC chuan 57%-a tisang turin rawtna a siam a, ZPM-in la tisang lo hrâm tura a nawr chungin JERC chuan 20.68%-in a tisang ta tho a ni," an ti a; sum leh páia harsatna thlen laia electric bill tihpun chu dodalin, April 7, 2021 khan Vanapa Hall kawtah electric bill tihpun an dodal thu an lo auchhuahpui tih an sawi.

ZPM party chuan, bill complaint duh tan office-a kal tura sorkarin mipui a hriattir chuan Covid-19 laka invênna atana kalphung khauh tak, inkar hlata awm a namnûl tih tarlangin, "A hlauhawm em em a ni," an ti. ZPM hian Power Minister a zin avangin an ngenna hi a office staff-te hnenah an hlan a ni.

ZPM-in Power Minister-a an thlente
* July 2021 electric bill hi meter reader-te hian a hmuna kal loin bill an siam niin kan hria.
* Energy meter hi páwnah kan dah deuh vek avangin a hmuna kal loa bill siam hi a dik lo. Hri hi chhuanlam tling a ni lo a, dan kalh a ni.
* Hripui avangin complaint tura kal a rem lo a, mipui tan harsatna thuah hnih min siamsak a ni.
* Bill complaint mipui leh thawktute tan hri kai palh awm theih a nih avangin a him lo em em.
* Lockdown avanga mi tinin sum leh pai harsatna kan tawh avangin mipui phurrit chhâwk zawnga bill siam a ṭul hle.
* In luah man, sikul fee leh thil dang tam takah inhrethiam tawn tura kan inzirtir mek laia hetiang bill hian mipui min barakhaihin min tichî-âi hle a ni.