Tuipuiralah ráltlân 1,451 an awm mek

Myanmar ram tual­chhung buai avanga sahimna zawnga Mizorama lut an awm belh zel a, haw chho an awm ve zel bawk. Nimin khan Champhai district-a Tuipuiral huam chhungah Myanmar ráltlân mi 1,451 an awm mek.

Tuipuiral Group YMA secretary B Challianngura hnen aṭanga thu dawn danin, an huam chhunga Myanmar ráltlân awm mek 1,451 zingah Farkawn khuaa awm tam berin, mi 780 an awm mek a; Vaphai-ah 179, Khawbungah 157, Thekte-ah 135 leh Zawlseiah 100 awmin, hengte hi ráltlân 100 awm tlinna khuate a ni. Hetih lai hian, Chawngtui leh Vanzau khuaah chuan ráltlân an awm rih lo.

Vanglaini zawhna chhángin B Challianngura chuan, Myanmar aṭanga Mizorama ráltlân an luh belh ve reng rualin, rawn lut tawh, hun eng emaw chen awm hnua haw chho leh ta pawh eng emaw zat an awm thu a sawi.

Tuipuiral Group YMA Secretary chuan, a hma deuha khaw chhunga awm loa Ṭiau lui hnaih ramhnuaia awm ṭhin chu tunah chuan an awm tawh loh thu a sawi a; Mizorama rawn lut tharte'n Covid-19 an vei leh vei loh chungchangah, "Rawn lut thar apiang chu kan quarantine nghal zel a, a remchan veleh sample kan endiksak ṭhin," a ti.

Myanmar ram chhung chanchin zawhna chhángin B Challianngura chuan, buaina a la reh lo a, an la inkap deuh reng nia an hriat thu a sawi bawk.