Sikul kái theihna tur khua Inhriattir an la awm rih lo
Mizoram sorkarin Aizawl Municipal Corporation (AMC) páwn lam, Covid-19 vei awm lohna khuaah sikul kal remti mah se, nimin thleng khan School Education department chuan sikul hawn theihna tur khua an hnena inhriattir an la dawng lo.
Mizoram sorkarin Covid-19 avanga inkaihhruaina a siam thar ber leh hman mekah, AMC páwn lam, Covid-19 vei awm lohna khuaah sikul kai theih a ni a, DC leh village task force ruahmannain sikul kai ṭan theih a ni. Sorkar thuchhuah bawhzui hian School Education department chuan August 9, 2021 khan AMC pawn lam hripui vei awm lohna khuaa sikul kai theih a nih thu notification tichhuakin a tarlang ve leh bawk.
Vanglaini palai zawhna chhangin School Education director James Lalrinchhana chuan, sikul kái thei tur report an la dawn loh thu a sawi a, "DC thupek angin sikul kai tur a ni a, sikul kai thei tur report kan la dawng lo a, kai thei khua chu an awm ngei kan beisei," a ti.
School Education Director sawi danin, khaw pakhat aṭangin sikul an kal theih tur thu a thuphungin an dawng tawh a, mahse, an DC-te beráwn chungin DC thupeka hawn tur a nih avangin an khuain an remtih ringawt a tâwk lo. DC pakhat chuan an huam chhunga sikul kai thei tur an awm ngei a beisei thu department-ah a hriattir tawh a ni.
Hetih lai hian, village task force-te leh DC-te'n ruahmanna siam a, DC remtihnaa sikul kai theihna tur khua report School Education department-ah thehluh a la awm lo.
Zirtirtute awm dan tur chungchang zawhna chhangin James Lalrinchhana chuan, "Aizawl emaw, khaw dang emawa sikula thawkte chuan Covid-19 lakah an fihlim ngei tih finfiahna an lâk a ngai ang. Chumi hnuah an khuaa village task force-te'n ruahmanna an siam angin an inkhung ve leh mai turah kan ngai," a ti.
Hetih lai hian, Vanglaini palai thu dawn danin, khaw tam tak, Covid-19 vei awm lohna khuaahte chuan nunphung pangngaiin an nung tawh. Mahse, sikul hawn a nih si loh avangin zirlai naupangte'n tih tur an nei lo a, nu leh pa tam tak chuan sikul hawn thuai an nghakhlel hle a ni.