Zirliana'n ramri hnaih khuate a tlawh Hmasawnna hna thawh dan tur a enfiah

Power & Electricity minister R Lalzirliana chuan nimin khan ramri hnaiha khuate a tlawh a, khaw tihhmasawn dan tur leh police duty-te awmna hmun thawm ṭhat dan tur a enfiah. R Lalzirliana hi deputy chief whip Lalrintluanga Sailo, Mamit bialtu MLA H Lalzirliana leh Serlui bialtu MLA Lalrinsanga Ralte ten an ṭawiawm.

R Lalzirliana chuan, July 26, 2021-a Vairengte daia thil thlengah Assam police pasarih an thi chu pawi a tih thu a sawi rualin, thil thleng chu Assam cho chhuah a nih thu a sawi a, "Thil thlen hnuah kan châk lâkna ber NH-306 an dang a, rilṭáma min hrêk hlum theih an beisei a ni. Assam CM Himanta Biswa Sarma hi Mizo mipui leh an chhehvel state-te'n a chhe zawnga an hriatreng lohna turin awm se ka duh," a ti.

Ramri hrûla khua awmte tihhmasawn chu Mizoram sorkarin a ngai pawimawh tih sawiin Power Minister chuan, "Hmasawnna hmahruai ni turin kawlphetha pek chhuahna changtlung zawka thawm ṭhat tum a ni a, hmun ṭhenkhatah chuan hna kalpui ṭan a ni tawh," a ti a; Buarchep, Phainuama leilet neitute hman theih tur leh police duty-na hmuna êng chhit theihna turin CM ruahmannain 25 KVA transformer bun thuai tum a nih thu a sawi.

R Lalzirliana chuan, tun hnaia ramria thil thleng avangin ramri venhim kawnga inpuahchah chhunzawm a pawimawh zual thu sawiin, "Mizoram police-te huaisenna a fakawmin a thlamuanthlak hle. Ramri hnaiha khaw awmte ramri venghim tura an inpekna a ropui. Ramri hnaih khua tihhmasawn hi ramri venna pawimawh a nih angin Mizoram sorkar pawhin a ngaih pawimawh ber pakhat a ni," a ti.

PE Minister hian Buarchepa police duty-te tan chawhmeh leina tur Rs. 40,000 a pe a, mi inphalte kaltlangin khawtlang hman tur aurinna (PA system) a pek bakah, kawlphetha lak luh a nih hmaa êng chhit lailawk nan solar lighting unit 20 a pe a ni.

Saihapui-V khawtlang leh police duty-te chawhmeh man tur Rs. 30,000 leh Saihapui-V branch YMA hnenah Rs. 6,000 a pe a; Vairengte Joint VC leh Vairengte police duty-te hnenah Rs. 10,000 ve ve a pe bawk.

Bialtu MLA Lalrinsanga Ralte pawhin Saihapui-V YMA hnennah aurinna hmanrua a pe a ni.