Lengpuiah sangha no hralh chhuah a ni

Fisheries minister K Lalrinliana chuan nimin khan Lengpuia sangha khawina hmunpui, Fish Seed Farm a tlawh a, Ovatide hmanga thar sangha no hralh chhuahna hun a hmanpui.

K Lalrinliana chuan, sangha no tihpun kawngah tualchhunga sangha khawitute'n ṭan an lâk a ngaih thu sawiin, "Fisheries department chuan sangha khawitute zinga sangha no thar tuipuite chu sorkarin a duhsak dawn a ni," a ti.

Fisheries Minister chuan, tun dinhmuna Mizorama kum tina sangha no lak khawm zinga a zatve aia tam chu state páwn aṭanga lak luh a nih thu sawiin, "Páwn lam mite hnenah pawisa tam tak kan chhûng lut ziah tihna a ni a, hei hi sorkar chuan ṭha a ti lo a, sanghaa intodelh bakah, sangha no thar kawngah ṭan a la mek zel a ni," a ti a; tualchhung luia sanghate pawh khawi tum mek a nih thu a sawi.

Minister sawi danin, Lunglei lamah Nghaphusen hlawhtling takin thar mek a ni a, Lengpuia sangha no tihpunna tuikhuahahte pawh Nghaphusen, Nghahrah leh Léngphar chi khawi pun mek a ni.

Nimina sangha no an hralhte chu Indian Major Carps (Rohu & Mrigal) leh Exotic Carp chi khat, Grass Carp-te a ni a, hatchery-a tuitir ngai vek a ni. Sangha pui (brooders) tur bikte chu farm-ah uluk takin a bika châwm leh enkawl a ni a, an tui theih nan damdawi Ovatide hmanga chiu niin, hatchery-ah tuitir a ni.

Sangha tui lâk khawmte chu keutirna hmun hatching pool-ah ni nga chhung dah a ni a, sangha notê keu hlim (spawn) 12,75,000 zet thar niin, a enkawlna dil bik rearing pond-ah uluk taka enkawl mek a ni. Sangha note chu an thi awlsam a, mortality rate a sang tih an tarlang.