KHAWTHLIR

Brig. T Sailo Park
LAD minister K Lalrinliana chuan nimin zing khan Lengpuia Brig. T Sailo Park a tlawh a; Park chhunga hmalaknate enin, LAD official-te nen cheibàwl ngai laite an enfiah. Minister chuan, LAD department-in Hlimena park an siam chu hlawhtling takin páwn lam mi enkawltir mek a nih thu sawiin, Brig. T Sailo Park pawh sum tam zawk a thawh chhuah theih nan leh mipui tana remchang zawk a nih theih nan sorkarin mi dang enkawltir ṭha a tih thu a sawi.

Meizial man
Assam Rifles leh Zokhawthara Customs department-te chuan August 10, Thawhlehni khan Old Hrikawnah ram dang meizial báwmpui 200 an man. Foreign cigaratte an man hi Rs. Rs. 6,96,000 hùa chhût a ni.

Bunghmunin hlân
Bunghmun Village Task Force chuan an khaw mipuite'n Lunglei Electric Veng mipui ṭanpuina atana chawhmeh chi hrang hrang an lak khawmte chu nimin khan Electric Veng VTF hnenah an hlân. Electric Vengah hripui vei an tam avang leh containment zone a nih ṭhin avanga ṭanpuina tur hian Bunghmun khaw mipuite chuan an lo leh huana thlaite an lak bakah, mautuai/rawtuai an khawrh a, LPK tipper pakhat leh Pik-up pahnih phur tâwk an lak khawm chu an pe a ni.

MLA-in hlan
Aizawl West-I bialtu MLA Zothantluanga chuan, a bial chhung Phunchawnga Covid-19 vei mi 115 an hmuhna Operation Kingdom Ministry hnenah hripui veite enkawlna atana pawimawh thil chi hrang hrang nimin khan a pe. Govt. Complex, Chawlhhmun leh Tanhril LTF-te hnenah an veng community covid care centre enkawlna tur mamawh chi hrang hrang a pe bawk.

Covid-19 vei thi
Biswas Kumar (70), Diblibagh, Lunglei district chu chu nimin chawhnu dar 1:30 khan Covid-19 vangin Lunglei Pukpuia dedicated covid health cantre-ah a thi. Amah hi Covid-19 positive a ni tih August 10, Thawhlehni khan hmuh chhuah a ni a, DCHC-a dah nghal ni mah se, hripui a vei tih hmuh a nih tukah a thi a ni.