COVID-19: Mizoram dinhmun : Hripui vei 863 hmuh belh a ni

August 10, Thawhlehni khan Mizoramah Covid-19 vei mi 863 hmuh chhuah a ni a, August thlaah mi 7,396 hmuh chhuah a ni tawh. Nimin khan hripui laka fihlim tawh mi 680 chhuahtir an ni a, mi pakhat a thi.

Covid-19 vei hmuh tharte chu mipa 468 leh hmeichhia 395 an ni a; ZMC laboratory-a hmuh chhuah 37, TrueNAT-PCR hmanga hmuh 36, RAT hmanga hmuh 788 leh Fluorescent Immu­noassay (FIA) hmanga hmuh pahnih an ni.

Hripui vei hmuh thar mi 863-te chu symptom nei 448 leh nei lo 415 an ni a; tualchhunga kái 860 leh state pawn aṭanga tun hnaia rawn lut pathum niin, tualchhunga kái zingah kàina chin hriat loh mi 558 an awm. IDSP record angin, Mizoramah Covid-19 vei mi 46,320 hmuh chhuah a ni tawh a, mipa 24,116 leh hmeichhia 22,204 an ni. Nimin tlai dar 5 thleng khan mi 34,402 (74.27%) chhuahtir an ni tawh a, mi 172 (0.37%) thi tawhin, enkawl mek mi 11,746 (25.36%) an awm.

August 10, Thawhlehnia swab sample endik dan chu - ZMC laboratory-ah 284, TrueNAT hmangin district pariatah 167, RAT hmangin district 11-ah 6,024 leh, FIA hmangin Aizawlah 57 a ni a, a vaiin sample 6,532 niin, hripui vei hmuh chhuah 863 chu 13.21% a tling. Positive percentage hi ZMC-ah 13.02, TrueNAT-ah 21.55, RAT-ah 13.08 leh FIA-ah 3.50 a ni.

District hrang hranga Covid-19 positive hmuh chhuah zat chu - Aizawlah mi 590, Kolasib-ah 76, Lawngtlai leh Mamitah 53 ve ve, Lungleiah 50, Champhaiah 20, Hnahthialah 11, Siahaah pariat leh, Serchhip leh Saitualah pakhat ve ve a ni. Hripui vei hmuh thar mi 863 zingah naupang kum tling lo 270 vel awmin, an zinga mi 120 chuangin symptom an nei a; nausen kum khat tling lo panga awmin, a naupang ber chu ni 18 a ni. Kum 60 chung lam 40 vel awmin, an zinga a tam zawkin symptom an nei a, a upa ber chu kum 86 mi a ni.

August thlaa ni 10 chhungin Mizoramah Covid-19 vei mi 7,396 hmuh chhuah a ni tawh a, chawhrualin ni tin mi 739.6 hmuh chhuah an awm ang a ni. Mizorama Covid-19 vei hmuh tawh zat 46,320 chu kum 2011 chhiarpui angin, Mizorama mi 1,000 zelah hripui vei mi 42 an awm ang a ni. Nimin khan tlai dar 5 thlengin hripui laka fihlim tawh mi 680 chhuahtir an ni a; Aizawl district-ah mi 631, Mamit district-ah 28, Siaha district-ah 11, Lunglei district-ah paruk leh Lawngtlai district-ah pali an chhuak.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 11,895 hmuh chhuah a ni tawh a, TrueNAT-PCR hmangin 2,702, RAT hmangin 31,720, FIA hmangin pahnih leh Guwahati-ah pakhat hmuh chhuah a ni tawh. IDSP tarlan danin, August 10, 2021 thlengin Mizoramah swab sample 6,95,703 endik a ni tawh a, chu'ng aṭanga Covid-19 vei hmuh tawh zat 46,320 chu 6.66% a ni. Hripui vei hmuh tawh zinga mi 42,066 chu Mizoram chhunga kái chhâwng an ni a, mi 4,254 chu Mizoram páwn aṭanga an rawn luh hnua hmuh chhuah an ni.